УИХ дахь АН-ын бүлэг хурлаа хийлээ. Тус намын бүлэг намрын чуулгаанар хэлэлцэхээр төлөвлөсөн зарим хуулийн төслийн талаар хэлэлцээ. Бүлгийнхээ хурлаар хэлэлцсэн асуудлуудын талаар тус бүлгийн дарга Д.Эрдэнэбат, УИХ-ын гишүүн Ж.Батзандан, З.Нарантуяа нар мэдээлэл хийлээ.
Ж.Батзандан: -АН ард нийтийн санал асуулга явуулж байж Үндсэн хуульд өөрчлөлт оруулах нь зүйтэй гэсэн байр суурьтай байгаа. 2000 онд ард нийтээс асуулгүйгээр Үндсэн хуульд өөрчлөлт оруулсан. Үүнээс болж Байнгын хороо тавуулхнаа суугаад хуралддаг, чуулганы хуралдаанд 20-хон гишүүн сууж байгаад хууль баталдаг болсон.
Бүлгийн хуралдаанаар хэлэлцсэн дараагийн асуудал бол Үндсэн хуулийн Цэцийн шийдвэр байлаа. Хэнтийн аймгийн 42 дугаар тойрогт явуулах нөхөн сонгуулийг Цэц цуцалсан. АН үүнийг хууль бус шийдвэр гэж үзэж байгаа. Улс төрийн захиалгаар гаргасан шийдвэр. Тиймээс Цэцийн дүгнэлтийг АН-ын бүлэг хүлээж авахгүй гэсэн байр суурьтай байна.
З.Нарантуяа: -Засгийн газар эдийн засаг өссөн гэж байгаа боловч ард иргэдэд бодитой нөлөө үзүүлэхгүй байна. Харин ч эсрэгээрээ төгрөгийн ханш суларсан, инфляц болон шатахууны үнэ нэмэгдсэнтэй холбоотойгоор иргэдийн орлого буурсан.
УИХ дахь АН-ын бүлгийн гишүүд ийнхүү мэдээлэл хийснийхээ дараа сэтгүүлчдийн сонирхсон асуултад хариуллаа.
-Ерөнхийлөгч УИХ-ын чуулганы нээлтэд оролцож үг хэлэхдээ цаашдаа Ерөнхийлөгчийн тогтолцоотой болох ёстой гэсэн байр суурийг илэрхийлэх шиг боллоо. АН-ын бүлэг энэ асуудал дээр ямар байр суурьтай байгаа вэ?
Д.Эрдэнэбат: -Тогтолцооны асуудлаар шийдэл хийхэд олон хүчин зүйл нөлөөлнө. Ерөнхийлөгч шууд Ерөнхийлөгчийн тогтолцоотой болох ёстой гэж хэлээгүй. АН-ын бүлэг ямар тогтолцоотой байх ёстой вэ гэдгийг мэргэжлийн төвшинд судалгаа шинжилгээ хийсний үндсэн дээр хэлэлцэж шийдвэрлэх ёстой гэсэн байр суурьтай байгаа.
Ж.Батзандан: -Системын хямралаас гарах гарцыг хайх шаардлагатай болсон гэдэгтэй санал нэг байгаа. Чуулганы нэгдсэн хуралдаанд үг хэлсэн ҮАБЗ-ийн гишүүд ч тогтолцоогоо өөрчилж системийн хямралаас гарахыг уриаллаа. Сонгодог парламентын тогтолцоо руу явах ёстой гэж бодож байна. Өөрөөр хэлбэл, хүчирхэг Ерөнхий сайдтай болох хэрэгтэй.
