Улсын Их Хурлын Хууль зүйн байнгын хорооны 77.8 хувийн ирцтэйгээр өнөөдөр хуралдлаа.
Хуралдаанаар нөхөн сонгуультай холбоотойгоор Үндсэн хуулийн цэцийн дүгнэлтийг хэлэлцэж 92.9 хувийн саналаар хуулийн төсөл дэмжсэнгүй. Хуралдааны үеэр УИХ-ын гишүүн Б.Пүрэвдорж “Нөхөн сонгуультай холбоотой асуудал хууль зөрчсөн гэж Үндсэн хуулийн цэц үзсэн. Энэ бол Ардын намын хийж байгаа ажил. Ардын намынхан нөхөн сонгуулиар ялагдана гэхээс айсандаа цэцээр ийм шийдвэр гаргуулсан” хэмээн хэлсэн нь эрх баригчдын дургүйцлийг хүргэв.
Л.Мөнхбаатар “Сонгуулийн тухай хуульд ээлжит сонгуульд оролцох төрийн албан хаагчийн хувьд сонгуулийн жилийг нэгдүгээр сарын 1-нээс ажил албан сонгуулиас чөлөөлөгдөхөөр заасан байгаа. Нөхөн сонгуульд оролцох төрийн албан хаагчийн тухайлан заалт байхгүй байна. Ер нь нөхөн сонгуулийг товлон зарласан УИХ-ын тогтоол үндсэн хууль зөрчих үндэслэл болсон хэмээн Үндсэн хуулийн цэц дүгнэлт гаргасан байна. Энд Үндсэн хуулийн цэцийн дүгнэлтийг одоо хүлээж авсан ч, эс авсан ч Сонгуулийн тухай хуульд нөхөн сонгуульд оролцох төрийн албан хаагчийн ажил албан тушаалаасаа хэзээ чөлөөлөгдөх зохицуулалтыг бий болгох шаардлагатай. Нөгөө талаар сонгуулийн товийг аравдугаар сард зарласан ч, ирэх оны зургадугаар сард зарласан ч ялгаагүй сонгуулийн тухай хуульд өөрчлөлт оруулахгүй бол нөхөн сонгууль товлон зарласан УИХ-ын тогтоол Үндсэн хууль зөрчих болно. Тиймээс бид цэцийн дүгнэлтийг хүлээж аваад сонгуулийн тухай хуульд холбогдох өөрчлөлтийг оруулбал яасан юм гэсэн бодолтой байна” гэлээ.
Харин УИХ-ын гишүүн Д.Лүндээжанцан Сонгуулийн тухай хуулийг шинэчлэн найруулах ажлын хэсэгт ажиллаж байгаа бөгөөд энэ намрын чуулганаар батлуулахаар төлөвлөж байгаа гэлээ. Тэрбээр, “Одоо боловсруулж буй хуулийг намрын чуулганаар батлуулж амжихгүй хэмээн үзвэл гишүүд өөрсдөө нэмэлт, өөрчлөлтийн төсөл боловсруулах замаар дээрх асуудлыг шийдвэрлэх боломжтой” гэв.
Ийнхүү санал хураалт явуулахад хуралдаанд орсон гишүүдийн 92 хувь Үндсэн хуулийн цэцийн дүгнэлтийг хүлээж авах шаардлагагүй гэж үзлээ.
Р.Хишигжаргал
