Эдийн засгийн байнгын хороо хуралдаж байна. Хуралдаанаар Ерөнхийлөгч Х.Баттулгын 10 дугаар сарын 12-ны өдөр өргөн мэдүүлсэн Валютын зохицуулалтын тухай хуульд нэмэлт оруулах тухай хуулийн төсөл болон хамт өргөн мэдүүлсэн Төв банк /Монголбанк/-ны тухай хуульд нэмэлт оруулах тухай хуулийн төслийг хэлэлцлээ.

Энэхүү хууль нь төгрөгийн тогтвортой байдлыг хангах, гадаад валютын улсын нөөцийг эзэмшин удирдах, гадаад валютын нөөцийг нэмэгдүүлэх чиг үүргийн хүрээнд стратегийн ач холбогдол бүхий ашигт малтмалын ордыг ашиглаж валютын орлого олдог хуулийн этгээдийн мөнгөн гүйлгээ, төлбөр тооцоог Монголбанк гүйцэтгэх эрх зүйн зохицуулалтыг бий болгох ач холбогдолтойг Монгол Улсын Ерөнхийлөгчийн Тамгын Газрын Дарга З.Энхболд танилцууллаа.

Мөн “Хууль батлагдсан тохиолдолд Монголбанк өөр дээрээ байршуулсан, тодорхой шаардлага хангасан хуулийн этгээдийн дансаар дамжуулан гадаад валютын улсын нөөцийг нэмэгдүүлэх арга хэмжээ авах, тэдгээрийн экспортын орлогыг Монгол Улсаар дамжуулах эерэг үр нөлөөтэй талаар хууль санаачлагчийн хийсэн судалгааны ажлуудад дүгнэгдсэн” хэмээн ярилаа.

Т.Аюурсайхан гишүүн “Үндэслэлийг ойлгож байна. Гэхдээ явцуу хүрээллээр хийсэн байна, зөвхөн Монголбанк гэсэн дээр хуулийн төсөл унаад байгаа. Хүрээллийг нь өргөн цар хүрээнд арилжааны банк зэргээр томсгох хэрэгтэй гэв. Харин Ж.Эрдэнэбат гишүүн “Ерөнхийлөгч оруулж ирсэн болохоор өмнө нь улс төржөөд унагаасан. Одоо оруулж ирэхээр М.Оюунчимэг нарын валютын тухай өргөн мэдүүлсэн хуулийн зүйлтэй адил байхад шүүмжилж байна. Ер нь хоёр хуулийг нэгтгээд ажлын хэсэг байгуулъя. Оюутолгой дээр алдаатай, оноотой зүйл бий. Гэхдээ Оюутолгой Монголыг авч явж байгаа нь үнэн. Тиймээс энэ хуулийг дэмжээд явъя” гэв. УИХ”ын гишүүн М.Оюунчимэг ч хоёр хуулийг нэгтгэхийг зөвшөөрч хуулийн томьёоллыг хамт хийх боломжтойг хэлж байлаа.

Ийнхүү гишүүд санал, шүүмжлэлээ хэлсний дараа дараа санал хураалт явуулж 100 хувийн саналаар санал дэмжигдсэн юм.

Уг хуулийн төслийг өмнө өргөн мэдүүлж байсан ч УИХ-ын хаврын чуулганаар буцаагдсан юм.

Р.Хишигжаргал