"Сентерра Гоулд" лицензээ зарсан гэсэн мэдээлэл гараад байгаа. Энэ талаар УИХ-ын зарим гишүүдээс тодрууллаа.
УИХ-ын гишүүн О.Баасанхүү “Надад нарийн мэдээлэл алга, хэвлэлийн л хэмжээний мэдээлэлтэй байна. Хэвлэлийг эх сурвалж болгоод хуульчийн үүднээс дүгнэвэл нэгдүгээрт, өөрийнхөө талын хувьцааг зарахдаа нөгөө талдаа мэдэгддэг хуультай. Өөрөөр хэлбэл 34 хувийн хувьцаагаа авах уу эсвэл зарах гэж байна гэдгээ мэдэгдэх хуультай. Хоёрдугаарт, хувьцаа эзэмшигчийн хувьд буюу аливаа хамтарсан компани хувьд хувьцаагаа зарах нэг өөр асуудал, лиценз шилжүүлэх нь бас өөр ойлголт. Лицензийг шилжүүлэх гэдэг бол эзэмшигчээс эзэмшигчийн хооронд өөрчлөгдөх асуудал. Гэхдээ эзэмшигчээс эзэмшигчийн хооронд шилжихдээ тодорхой хэмжээгээр татвар төлдөг. Одоогоор надад байгаа мэдээллээр ашигт малтмалын лицензээ тодорхой түншлэлд шилжүүлсэн үү, эсвэл өөрийн эзэмшлийн хувиа зарсан уу гэдэг нь өөрөө тодорхой бус байна. Тиймээс энэ мэдээллийг ажигласан байр суурьтай байна” гэв.
Харин УИХ-ын гишүүн, Уул уурхай, хүнд үйлдвэрлэлийн сайд Д.Сумъябазар “Одоогоор нарийн мэдээлэл алга. Олон улсын Хөрөнгийн бирж дээр хувьцаа арилжаалсан гэсэн та бүхэнтэй л адилхан мэдээлэлтэй байна. Яг нарийн мэдэж байгаа зүйл алга. Мэдээж бүртгэлийг Улсын бүртгэл хийх ёстой. Түүний дараа лицензийн шилжих хөдөлгөөн хийнэ. Аж ахуйн нэгжүүд нь худалдан авсан юм уу, яасан гэсэн ямар ч ойлголтгүй байна” гэлээ.
Мөн түүнээс “Рио Тинто”-гийн талаар удирдлагууд тантай уулзах хүсэлт тавьсан. Ямар асуудлыг хэлэлцэх талаар тодруулахад,
-Өнөөдөр "Рио Тинто" компанийн удирдлагуудтай уулзах гэж байна. Нөхцөл байдал, зарим асуудлаар ярилцана. Тэдний юу ярихыг эхлээд сонсох ёстой. Түүний дараа асуудлыг хэрхэн шийдвэрлэхээ ярина.
-"Рио Тинто" яг ямар асуудлаар уулзах санал тавьсан юм бэ?
-Олон асуудал бий. Татвартай холбоотой, далд уурхайн бүтээн байгуулалтын явц, эрчим хүчний эх үүсвэр болох цахилгаан станцын байршил гэх мэт асуудлыг ярьж байна. эцсийн байдлаар шийдвэрлэсэн зүйл байхгүй байна.
-Засгийн газар "Оюутолгой"-той таван асуудал дээр тохиролцсон гэж байсан шүү дээ?
-Эхний байдлаар тохирсон зүйл байхыг үгүйсгэхгүй. Эцсийн байдлаар талууд зөвшилцөж байж гарын үсэг зурж баталгаажих ёстой” хэмээн ярив.
Р.Хишигжаргал
Сэтгэгдэл (5)