УИХ-ын Төрийн байгуулалтын байнгын хороо 2018 оны намрын ээлжит чуулганаар Монгол Улсын үндсэн хуульд оруулах нэмэлт, өөрчлөлтийн төсөл, Монгол Улсын Их хурал, Монгол Улсын Ерөнхийлөгч, аймаг, нийслэл, сум, дүүргийн ИТХ-ын сонгуулийн тухай хуулийн төсөл, Нийслэлийн эрх зүйн байдлын тухай хуулийн шинэчилсэн найруулгын төслүүдийг хэлэлцүүлэхээр бэлтгэж байна.

Үндсэн хуульд нэмэлт, өөрчлөлт оруулах төслийг боловсруулах ажлын хэсэг УИХ-ын даргын 78 дугаар тогтоолоор УИХ-ын гишүүн Д.Лүндээжанцангаар ахлуулсан ажлын хэсэг ажиллаж байгаа юм.

Уг ажлыг Монгол Улсын Үндсэн хуульд нэмэлт, өөрчлөлт оруулах журмын тухай хуульд “УИХ, хууль санаачлагч нь Үндсэн хуульд нэмэлт, өөрчлөлт оруулах үйл ажиллагааны бү үе шатанд ард түмний бүрэн эрхт байдал, оролцоог хангах”, “Бодитой ил тод байх” гэж заасны дагуу 2017 оны дөрөвдүгээр сард Зөвлөлдөх санал асуулга, 2017 оны долдугаар сараас есдүгээр сард Олон нийтийн хэлэлцүүлгийг зохион байгуулж ирд иргэдээс ирсэн саналууд, УИХ-ын ажлын хэсгээс хандан иргэд, байгууллагуудаас саналаа илгээснийг нэгтгэн дүгнэж төсөлд тусгажээ.

Үндсэн хууль оруулах нэмэлт, өөрчлөлтийн төсөлд УИХ-ын болон гишүүний үүрэг хариуцлагыг нэмэгдүүлэх, Эрх мэдлийн хуваарилалтыг тэнцвэржүүлэх, Шүүх засаглалын хараат бус байдлыг баталгаажуулах, улс төрөөс хараат бус төрийн албыг бэхжүүлэх, Улс төрийн намын үйл ажиллагаа, санхүүжилт, хариуцлагыг тодорхой болгож, сонгуулийн тогтолцоог хуулиар тогтоох, Засаг захиргаа нутгийн удирдлагын тогтолцоог боловсронгуй болгох чиглэлээр 42 заалт бүхий төслийг боловсруулсан байна.

Ажлын хэсэг төслөө Монгол улсын Ерөнхийлөгч, Монгол Улсын Ерөнхий сайд, ҮАБЗ, Хүний эрхийн үндэсний комисс, Монголбанк, Шүүхийн Ерөнхий зөвлөлөөс санал авахаар илгээжээ. 

 Б.Лхам