УИХ-ын гишүүн, Засгийн газрын Хэрэг эрхлэх газрын дарга Г.Занданшатараас цаг үеийн зарим асуудлыг тодрууллаа.
-ЖДҮДС-аас гишүүд зээл авсантай холбоотойгоор ажлын хэсэг гарч шалгаж байгаа. Ажлын хэсгийн дүгнэлт гарсан болов уу?
-Одоогоос хоёр жилийн өмнө буюу Засгийн Газрын 2018 оны есдүгээр сарын 12-ны өдрийн хуралдаанаар Жижиг дунд үйлдвэрлэлийн дэмжих сангийн асуудлын талаарх холбогдох мэдээллийг авч шалгаж, танилцуулах үүрэг өгсөн. Ингэснээр өнөөдрийн энэ асуудал бол Засгийн Газраас хийсэн шалгалтын үр дүн гэж болно. Ингээд 10 дугаар сарын 10-ны өдөр Засгийн Газрын хуралдаанаар нээлттэй ил тод хэлэлцүүлсэн. Энэ бүх асуудал бол өмнөх жилүүдэд ил тод болсон. Сонгон шалгаруулалтгүй олгодог байсныг нээлттэй ил тод сонгон шалгаруулалтаар олгодог болох үүрэг 10 дугаар сарын 10-ны хурлаар хэлэлцэж, үүнийг шалгаж тодруулах үүрэг өгсөн. Тэр хурлаар ерөнхийдөө шилэн болох үүрэг өгөгдсөн. Яригдаад байгаа компаниуд нь сайд, гишүүдтэй үнэхээр хамааралтай компани уу, үгүй юу гэдгийг хууль хяналтын байгууллага шалгаж тогтооно.
-22 сангийн үйл ажиллагааг шалгана гэсэн үг үү?
-ЖДҮДС-аас эхлээд бусад 22 санд шалгалт хийх үүргийг Ерөнхий сайд, Сангийн сайд нар холбогдох байгууллагуудад өгсөн байгаа.
-Шалгалтаар нэлээд асуудал гарч ирнэ гэсэн таамаглал олон нийтийн дунд их байна?
-Ер нь засаглал, Үндсэн хуулийн өөрчлөлт гээд яриад байгаа зүйлүүд чинь ямарваа нэг буруу зүйл гардаггүй байхыг зорьж, өөрчлөлт хийх гээд байгаа шүү дээ. Монгол Улс өрд орсон Чингис бондын асуудал чинь сүүлийн нэг өдөр бий болоогүй. Төсвийн хөрөнгийн зарцуулалт цогцуулалтгүй, үр ашиггүй байгаатай холбоотой. Бид Чингис бонд, Хөгжлийн банкны асуудлыг хянан шалгах ажлыг эхлүүлсэн. Хөгжлийн банкийг нээлттэй, гадны менежменттэй ил тод болгох саналыг Хөгжлийн банканд тавиад явж байна. Удахгүй үүнийг зарлана. Төрийн банкны хувьцааг хувьчилж олон нийтэд нээлттэй болгоно. Өнөөдрийн энэ нийгэмд гурван сая иргэн, гурван сая фэйсбүүк хэрэглэгч гэдэг чинь өөрөө хянан шалгагч, ардын явуулын станц, мөрдөгч тогтоогч болсон. Ийм орчинд ил тод болгох ардын хяналтыг тогтоох шилэн машин гээд санаачлаад явж байна. Яриад байгаа бүх асуудлыг цэгцлэх зорилгоор сарын өмнө төрийн албаны бүх шатанд адислалчлал явуулах улсын зөвлөгөөнийг зохион байгуулсан. Өчигдөр комиссынхондоо семинар зохион байгуулсан. Бүх хүмүүсийг сахилга, ёс зүй, мэргэжил, ур чадварын хувьд төрийн албанд тэнцэж байна уу гэдэг адисчаалалын асуудал улс орон даяар эхэлж байна.
-Я.Содбаатар сайдад хариуцлага хүлээх үү. Б.Батзориг сайдад хариуцлага тооцчихоод яагаад Я.Содбаатар сайдад хариуцлага хүлээлгэхгүй байгаа юм бэ?
-Япон, Герман улсуудын жишгээр төрийн албаны сахилга хариуцлагын хуулийг бэлэн болгоод өргөн барих гэж байна. Хуулийн төсөл бэлэн болсон. Энэ хуулиар сахилга хариуцлага тооцох асуудал илүү тодорхой. Тиймээс энэ асуудлыг энэ шилэн болгох нь өнөөдрийн асуудал байгаа юм. Энэ асуудлуудад хууль хяналтын байгууллага нөлөөлсөн нь үнэн байна уу гэдэг тогтоогдоно. Харин хариуцсан сайд нь өөрөө ёс зүйн хариуцлага хүлээж “Миний хариуцаж буй салбарт зөрчил дутагдал гарсан байна. Иймээс би албан тушаалаасаа огцорч байна” гэж мэдэгдлээ өгсөн, Ерөнхий сайд ч шаардлага тавьсан. Үүнийг УИХ-д өргөн мэдүүллээ.
-Эрдэнэт үйлдвэрийн 49 хувийн маргаан юу болж байгаа вэ?
-Нэг амьсгаагаар бүх асуултад хариулъя гэвэл амжихгүй. Хэвлэлийн хурал дээр би тодорхой зүйлүүдийг ярина. 49 хувийн маргаан шүүх дээр явж байгааг мэдэж байгаа байх.
-Дээд шүүхийн Ерөнхий шүүгчид гомдол гаргасан байсан шийдэгдээгүй байгаа юм уу?
-Дээд шүүхийн Ерөнхий шүүгчид гомдол гаргасан байгаа. Засгийн Газар, УИХ шийдвэрээ гаргасан. 49 хувийг улсад авсан боловч шүүхийн шийдвэр гарсан. Ингээд ерөнхий шүүгч дээр гомдол гаргаад хэлэлцэгдээд явж байгаа.
Р.Хишигжаргал
Сэтгэгдэл (6)