УИХ-ын Хуульзүйн байнгын хорооны өнөөдрийн хуралдаанаар Монгол улсын Ерөнхийлөгчийн төсөвт тавьсан хоригийг хэлэлцэж гишүүдийн 80 хувийн саналаар хоригийг хүлээж авсангүй.

Хуралдаанаар Хуульзүйн сайд Ц.Нямдорж “Би энэ хоригийн асуудлаар Төсвийн байнгын хорооны хуралд үгээ хэлсэн. Тиймээс нуршмааргүй байна. Хамгийн гол нь хоригт явж байгаа 500 тэрбум төгрөг гэдэг асуудал бий. Анх Засгийн газарт ярилцахдаа 350 тэрбум гэж байсан. Зураг, ТЭЗҮ байхгүй байсан. Тэгээд шийд гээд байсан. Аж үйлдвэрийн комбинатуудыг гэдэг олон тоон дээр үг байгаа, хориг дотор. Тэгээд Төсвийн байнгын хороон дээр тайлбарлахдаа "Энэ бол улсаас гарах мөнгө биш" гэж тайлбарлачхаад хориг дээр улсаас мөнгө гаргуулах гээд байгаа. Тиймээс энэ хоригийг хүлээж авах боломжгүй. Хоригт бүхэлд нь хориг тавихаар санхүүгийн гацаа үүснэ. Төсөв хуулиа ч, мөнгөний бодлогоо ч зөрчөөгүй. Гишүүдийн мөнгө гээд мушгин гуйвуулаад байгаа. Сонгогдож байгаа гишүүд төлөөллийн бүрэн эрхээ хэрэгжүүлдэг. Манай тойрог дээр асуудал шийдээд өг гэдэг. Түүнийг нь шийдэхээр авилгачин болдог. Эцсийн дүндээ ард түмэн авилгачин болчих гээд байна. Төсөв батлангуут гишүүд найман тэрбум төгрөгийг хувьдаа авдаг юм шиг тайлбарлаад байна. Нүүрсний үнэ тонн нь 75 ам.доллар байхад дундаж 55 ам.доллараар төлөвлөж болно. Сургууль, цэцэрлэг, эмнэлгийн асуудлыг байгааг төсөвт суутгасан. Үүнийг хөдөө орон нутагт ч, төвдөө ч шийдвэрлэ гэж У.Хүрэлсүх Ерөнхий сайд болсноосоо хойш яриад байгаа юм. Үүнийг л гишүүдийн мөнгө гэж улс төр хийгээд байх юм” гэлээ.

Харин Ц.Мөнх-Оргил гишүүн ярихдаа “Ерөнхийлөгчийн хоригийг хүлээж авах боломжгүй байна. Хэсэгчилсэн хориг тавьсан бол яриад байгаа хэсгийг нь авч үзэж болно. Гэтэл бүхэлд нь хориг тавьчхаар 2019 оныг улсын төсөвгүй угтах гээд байна. Бүхэлд нь хориг тавьсныг бид хүлээж авахаар шуурхай хэлэлцье гэхэд наад зах нь хоёр сарын хугацаа хэрэгтэй. Улсын төсөвгүй явбал төрийн албан хаагчид хөдөлмөрийн хөлсний доод хэмжээ 240 мянган төгрөгийн цалинтай, ахмадууд мөн доод хэмжээний тэтгэвэр авна. Төрийн ихэнх байгууллагууд ажлаа явуулж чадахгүй. Учир нь төсөв байхгүй.

УИХ-ын гишүүн С.Эрдэнэ “Төсөвтэй холбоотой Ерөнхийлөгчийн тавьсан асуудал нэг талаасаа үндэслэлтэй. Төсөв бол бүхэлдээ улстөржсөн, 2020 оны улс төрийн сонгууль руу чиглэсэн, тооцоо судалгаа муутай төсөв болсон гэж харж байгаа. Өнөөдөр гурван жилийн нийлбэр дүнгээр хойч үедээ долоон их наяд төгрөгийн үр үлдээсэн төсөв болж байна. Өнөөдөр бензин, шатахууны үнэ нэмэгдээд тоймоо  алдлаа. Цалин, тэтгэвэр нэмсэн ч иргэдийн гар дээрх цалин хүрэлцэхгүй. Эрх баригчдын хариуцлагагүй үйл ажиллагаанаас болж төсвийн нийгэмд өгөх үр өгөөж харагдахаа болилоо. Өнөөдөр төсвийн хоригийг хэлэлцэж байхад Ерөнхий сайд, Сангийн сайд байхгүй, төр эзэнгүй байна шүү. Ц.Нямдорж сайд л Засгийн газрыг төлөөлж байна. Монгол Улсын Ерөнхийлөгчийн тавьсан хоригийг зөв гэж харж байгаа. Энэ Засгийн Газар бий болохдоо өр тавихгүй гэсэн. Өөдрөгөөр харж төсөвлөсөн гэж байгаа боловч өнөөдрийг өнөөдрийн зорилгоо харж баталсан” гэв.

Р.Хишигжаргал