УИХ-ын гишүүн Н.Номтойбаяр тэргүүтэй УИХ-ын гишүүн Д.Оюунхорол, Н.Амарзаяа, Ж.Бат-Эрдэнэ нарын гишүүд ЖДҮ-г шалгах түр хороо байгуулахаар болсноо өнөөдөр хэвлэлхэнд дуулгав. Ж.Эрдэнэбатын Засгийн газарт Нийгмийн хамгаалал, хөдөлмөрийн сайдаар ажиллаж байсан, МАК-ийн эзэн Н.Номтойбаяр энэ ажлын хэсгийг ахалж ажиллах бөгөөд ЖДҮ-гүй гишүүд нь итгэл үнэмшлээрээ нэгдэхээр болсноо дуулгав. Яг л хулгайч, хулгайчийг бариарай гэж байгаа юм шиг сонсогдож байгаа биз. Ж.Эрдэнэбатын танхимын сайд байхдаа концессын хэрэгт холбогдож огцорч байснаа тэр өнөөдөр мартсан бололтой.

Н.Номтойбаярын аав Монголын томоохон бизнесмен, МАК группийг үүсгэн байгуулагч. Тус компани өнөөдөр уул уурхай, барилга, төмөр зам, агаарын тээвэр гэх мэт маш олон салбарт үйл ажиллагаа явуулж буй.

Одоогоос жил гаруйн өмнө Засгийн газраас дур мэдэн баталсан долоон концессын хамгийн эхэнд Н.Номтойбаяр тэргүүлж байв. “Оюутолгой-Цагаан суварга чиглэлийн агаарын шугам, дэд станц төсөл”-өөр концессын гэрээ сэм байгуулсан байдаг. Төсөвт өртөг нь монгол мөнгөөр 78 тэрбум 752 сая төгрөг. Нөгөө харааж зүхээд байгаа 1, 2, 3 тэрбумын ЖДҮ-ийн хажууд энэ бол маш их мөнгө. Монголын толгой бизнесменүүдийн нэг гэгдэх Б.Нямтайширын гэр бүлээрээ эзэмшдэг МАК компани ганцхан концессоор мөнгө олоогүй. Төрөөс бизнесийн салбарыг хөгжүүлэх бага хувийн хүүтэй, ямар боломжтой зээл байна тэр бүгдийг МАК л авдаг. Хачирхайлтай нь Н.Номтойбаяр МАН-ын гишүүн ч түүний бизнес аль ч намын үед хөгжсөөр ирсэн, боломжуудыг ашигласаар ирсэн. Хөгжлийн банкнаас гэхэд 2016 онд нийт 109,6 тэрбум төгрөгийн зээлийг ч мөн авсан байна.

Түүний араас концессоор 78,7 тэрбум төгрөг. Энэ бол бидэнд мэдэгдэж буй томоохон дүнтэй мөнгө. Чингис бондоос 80 орчим сая долларын зээл авч, үйлдвэр байгуулсан. Зээл авахынхаа өмнө Н.Алтанхуяг сайд руу байнгын хорооны хуралдаан дээр ширээ шааж босч ирээд, намынхаа ах нарт загнуулсныхаа дараа зээл авсан гэж улс төрийн хүрээнийхэн ч жиг, жуг гэдэг. Ж.Эрдэнэбатын Засгийн газрын сайд байхдаа өөрийнхөө компанийг 9,2 тэрбум төгрөгийн татвараас чөлөөлсөн байдаг.

/ЗГ-ын 201 тоот тогтоолоор 9,2 тэрбум төгрөгийн татвараас чөлөөлөгдсөн тогтоол/

Хөгжлийн банк, Чингис бондоос зээл  авсан зэрэг нь эрх мэдлээ ашиглаагүй, мэдээлэлд ойр, давуу байдлаа ашиглаагүй, нөлөөлөөгүй гэж хэлэхэд хэцүүхэн л юм. 

Аль ч төрд нүүртэй МАК-ийн эзэн Н.Номтойбаяр төрөөс мөнгө авсан жижиг гарын хулгайчдыг шалгаж, үнэн мөнийг тогтоох гэнэ. Ерөнхий прокурорын орлогч, Ерөнхий аудитор нь холбогдчихсон ЖДҮ-чдийг том гарын зээлдэгчид шалгаж, нийгэмд шударга ёс тогтооно гэвэл үлгэр болох биз. Жижиг, томоороо л ялгарч байгаа болохоос адилхан л хулгайчид. Татвар төлөгчдийн мөнгөн дээр туйлсан Н.Номтойбаяр мэт нь шударга үнэнийг тогтоодог болсон цаг юм гэж үү. Гэнэтхэн хулгай нь илэрхээр шударга ёсыг тогтоогч болж жүжиглэх чинь хулгайч хулгайчийг бариарай гэж чанга хашгирахтай адил байна шүү, Н.Номтойбаяр гишүүн ээ.