УИХ-ын гишүүн Д.Хаянхярваагийн албан бланк дээр нэр бүхий 27 гишүүн өнгөрсөн даваа гарагт Засгийн газрыг огцруулах бичгийг УИХ-ын дарга М.Энхболдод өргөн барьсан. Тэгвэл Засгийг газрыг огцруулах талаар бусад гишүүд ямар байр суурьтай байгааг хүргэе.
Ч.Хүрэлбаатар: Засгийн газрыг огцруулах үндэслэл байхгүй. Д.Хаянхярваа гишүүний мэдээллийг үзсэн. Нэлээд алдаатай, буруу зүйл ярьж байна лээ.
Б.Пүрэвдорж: МАНын гишүүд гарын үсэг цуглуулж, АН-ын зарим гишүүн дэмжиж өмнөх Засгийн газрыг огцруулж байсан. Өнөөдрийн У.Хүрэлсүхийн Засгийн газрыг огцруулах асуудал энэ намын өөрсдийнх нь дотоод асуудал.
Я.Санжмятав: Би гарын үсэг зурахгүй. Эд чинь өөрөө өөрсдийгөө ноолж байгаа улс шүү дээ. Бидэнтэй бидэнгүй 26 гишүүн гарын үсгээ зурчихсан байна.
Ж.Батзандан: У.Хүрэлсүхийн Засгийн газрыг огцруулах асуудлыг АН эргэж нухацтай ярих хэрэгтэй
Д.Тогтохсүрэн: Бүлгийн шинэ даргын хувьд гишүүдтэйгээ уулзаж ярилцах, энэ чиглэлээр нэлээн ажиллах бодлого байна.
Б.Энх-амгалан: Засгийн газрыг огцруулж болохгүй
Ц.Гарамжав: Зарим гишүүний зүгээс Удирдах зөвлөлийн шийдвэр таалагдахгүй байгаа учраас гишүүнийхээ хувиар санал бодлоо гаргах эрхтэй. Тиймээс тодорхой хэмжээнд Засгийн газар болон УИХ-ыг огцруулах нь зүйтэй гэсэн сөрөг саналуудыг бэлдэж, гарын үсэг зурж байгаа гэж дуулсан. Энэ бол гишүүдийн бүрэн эрхийн асуудал.
О.Баасанхүү: Засгийн газар амласан ажлаа хийхгүй байна. Утаа, шатахууны үнэ, валютын ханш гэх мэт асуудлаар амласан ажлаа хийгээгүй. У.Хүрэлсүх үтэр түргэн явах ёстой. Харагддаг шигээ хүн биш.
Д.Лүндээжанцан: Би ямар ч үед Засгийн газрыг огцруулахыг дэмжиж гарын үсэг зурж байгаагүй.
А.Ундраа: Жижиг, дунд үйлдвэрлэлийг хөгжүүлэх сангаас буруу зарчмаар зээл олгосон асуудалд хариуцлага тооцохгүй байгаад сэтгэл дундуур байгаа учраас Засгийн газрыг огцруулах бичигт гарын үсэг зурсан.
Н.Оюундарь: “Хүн хэлээрээ, мал хөлөөрөө” гэдгийн адил асуудлаа хоорондоо ярилцаж, ойлголцох ёстой гэж би хувьдаа үзэж байна.
Ш.Раднаасэд: Төсөв ч үгүй, Засаг ч үгүй болчих вий гэсэн болгоомжлол байна
М.Оюунчимэг: УИХ-ын гишүүний хувьд Засгийн газраар ингэж оролдох нь буруу гэж бодож байгаа. Засгийн газар сайн ажиллаж байна.
Ж.Бат-Эрдэнэ: Ард түмний хамгийн гол тавьж буй асуудал нь УИХ-ын 76 гишүүн чинь цэвэр юм уу, Засгийн газар шударга байгаа юм уу гэдгийг л ярьж байна. Тэгэхээр өнөөдрийн ард түмний хүсэн хүлээж байгаа зүйл дээр бид дүгнэлт хийгээд явах ёстой. Энэ үндэслэлээр нь Засгийн газрыг огцруулъя гэсэн гарын үсэг зурж байна.
Б.Наранхүү: Ерөнхийлөгч, УИХ-ын дарга, Ерөнхий сайдын түвшинд Монгол хүний муу, сайны ялгааг бус Монгол Улс гэж хараад хамгийн дургүй дайснаа зөв юм хийж байвал дэмжиж байж энэ улс орон цааш явах юм шиг харагдаж байна.
Сэтгэгдэл (6)