Монгол Улс анхдугаар Үндсэн хуулиа баталж, бүгд найрамдах улсаа тунхагласны баяр өчигдөр тохиов. Төрийн эрх барьж байгаагаас бусад улс төрийн намууд чимээгүй өнгөрүүлдэг энэ баяраар ХҮН-ынхан зурагт хуудас зориуд бэлдүүлэн, сошиал хуудсаараа мэндчилгээ дэвшүүлсэн юм. Зурагт хуудастаа Үндсэн хууль сугавчилсан Монгол ХҮН-ийг дүрсэлсэн нь гэхдээ сошиалын “хачиртай инээд” болсон билээ. Учир нь, зурагт хуудасны хүнийг ХҮН-ын хуучин дарга С.Ганбаатартай тун төстэйгээр дүрсэлсэн нь ХҮН-ын одоогийн дарга нарыг багагүй ичээгээд авав. ХҮН-ын дарга Л.Найдалаа зурагт хуудасны талаар “Ёроо, Ёмбоо, Ганбаатай адилхан харагдаж болно. Гэхдээ Үндсэн хууль тэвэрсэн, амбицтай Монгол малчин ХҮН мөн шүү” хэмээсэн бол тус намын Удирдах зөвлөлийн дарга Т.Доржханд, “Бид уг нь өөрсдөө захиалж зуруулсан юмсан. Ганбаа бас л араар зураачтай яриад царай төрхөө оруулчихдаг юм байх даа” хэмээн хошигносон юм. Саяхан л тэд хэвлэлийн хурал хийн С.Ганбаатар гэдэг хүн ХҮН намд огт хамаагүй гэж мэдэгдэж байсан билээ.

С.Нацагтовуу