Өчигдөр УИХ-ын гишүүн Л.Оюун-Эрдэнэ “Өчигдрөөс эхэлж Их Хурлын гишүүдийн гэр бүлийг баривчлах ажиллагаа явуулж байна. Гэр бүлийг нь хэрэв Засгийн газрыг хамгаалж үлдэх юм бол хэрэгт холбогдуулна гэдэг зүйл болж байна” хэмээн мэдэгдсэн.

Гэвч Л.Оюун-Эрдэнийн мэдэгдлийг хууль хүчнийхэн худал мэдээлэл гэж няцаагаад байгаа. Тодруулбал, өчигдөр АТГ-аас энэ талаар болон Жижиг, дунд үйлдвэрлэлийг хөгжүүлэх сантай холбоотой мэдээлэл хийсэн. Тэд гишүүдийн гэр бүлийг баривчилсан, сүрдүүлсэн зүйл огт байхгүй талаар албан ёсоор мэдэгдсэн.

Түүнчлэн УИХ-ын дарга М.Энхболд өчигдөр Цагдаагийн Ерөнхий газарт дээрх асуудлаар үнэн мөнийг шалгуулах хүсэлт явуулсан юм. Хүсэлтийн хариу нь иржээ.

Хариунд “Хүнс, хөдөө аж ахуй, хөнгөн үйлдвэрийн яамны Жижиг, дунд үйлдвэрийг хөгжүүлэх сангаас төрийн өндөр албан тушаалтнууд албан тушаалын байдлаа урвуулан ашиглаж, өөрсдийн хамаарал бүхий этгээдүүдэд зээл олгохдоо өөртөө болон бусдад давуу байдал бий болгосон, тус сангийн албан тушаалтнууд хахууль авсан байж болзошгүй үйлдэлд Алигатай тэмцэх газраас хэрэг бүртгэлийн 174100032, мөрдөн байцаалтын 180200480258 дугаартай хэрэгт мөрдөн шалгах ажиллагааны шуурхай байдлыг хангах зорилгоор Авлигын эсрэг хуулийн 18 дугаар зүйлийн 18.5, 23 дугаар зүйлийн 23.1.1, Засгийн газрын агентлагийн эрх зүйн байдлын тухай хуулийн 8 дугаар зүйлийн 8.4, Цагдаагийн албаны тухай хуулийн 21 дүгээр зүйлийн 21.1, 21.1.4 дэх заалтыг тус тус үндэслэн Авлигатай тэмцэх газар, Цагдаагийн ерөнхий газрын даргын хамтарсан 2018 оны А/119, А/269  дүгээр тушаалаар ажлын хэсэг байгуулан, мөрдөн шалгах ажиллагаа явуулж байна.

Дээрх шалгалтын ажиллагаатай холбоотойгоор Цагдаагийн байгууллагаас Улсын Их Хурлын гишүүдийн гэр бүл болон тэдгээртэй хамаарал бүхий иргэнийг баривчлах ямар нэгэн ажиллагаа явуулаагүй болохыг танилцуулъя” гэжээ.

АТГ, Цагдаагийн ерөнхий газрын даргын хариуг үндэслэн УИХ-ын дарга М.Энхболд Л.Оюун-Эрдэнэ гишүүнийг гүтгэлгээ залруулахыг шаардсан байна.

Ямартай ч хууль хүчний хоёр байгууллагаас Л.Оюун-Эрдэнэ гишүүний мэдэгдсэн зүйл явуулаагүй болохыг ийнхүү албан ёсоор мэдээлж байгаа юм.

Б.Лхам