МАН-ын Хяналтын Ерөнхий хорооны өчигдөрийн хурлаар МАН-аас таван гишүүнийг хөөх асуудал яригдсан билээ.

Энэ талаар МАН-ын Хяналтын хорооны дарга асан, гишүүн  Х.Болдмандалаас тодрууллаа.

-Өчигдрийн ХЕХ-ны хуралд 11 гишүүн оролцож таван гишүүнийг намаас хөөх асуудал яригдсан гэсэн. Энэ 11 гишүүнээс нэг гишүүн нь хөөхийн эсрэг байр суурьтай байсан тэр нь таныг гэсэн мэдээлэл байна. Энэ үнэн үү?

-МАН нэн шинэ үеийн түүхэнд гишүүдийгээ хоморголон намаас хөөх асуудал анх удаа яригдаж байна. Өмнө нь ийм асуудал гарч байгаагүй. Гэрдээ намаас олноор нь хөөх асуудал байж болно. Энэ нь намын дүрмийг ноцтой зөрчсөн, намын хамт олны эрх ашгийг хөсөрдүүлсэн тохиолдолд намаас гарсанд тооцох тухай асуудлыг Хяналтын Ерөнхий хороо ярьж болно. Гэхдээ манай намын дүрэмд ХЕХ санаачилж намаас хөөж гарсанд тооцох дүрмийн заалт байхгүй. Өөрөөр хэлбэл тухайн гишүүнийг бүртгэсэн бүртгэлтэй байгаа намын байгууллагынх нь эрх мэдлийн асуудал.

Хоёрдугаарт УИХ-ын гишүүдийг тав зургаагаар нь буюу хоттой хониноосоо шилж байгаа маягтай сошиол дээр байгаа мэдээг хэвлэж авч тавьж байгаад энийг энийг өшөө хэн байж болох вэ гэдэг асуудал ярина гэдэг бол манай Хяналтын Ерөнхий хороонд байж болохгүй зүйл. ХЕХ бол МАН-ын дүрмийг сахин биелүүлэх дээд хүчин байгууллага. Мөн МАН-д эв эеийг сахиулах үндсэн үүрэгтэй байгууллага.

Ийм хоёр үүрэгтэй. Гэтэл эв эеийг сахиулах үндсэн үүрэгтэй байгууллага маань улс төрийн байгууллага маань нам дотроо туйлд хуваагдсан ийм байдалтай байгаа үед гал дээр тос нэмж байгаа аятай байна. Нэг талын гэж байгаа гишүүдийг түүж авч хоморголон намаас халах тухай асуудал ярьж байна гэдэг бол ямар нэгэн мэдрэмжгүй дээрээс нь маш хариуцлагагүй үйлдэл болж байна. Эв эеийг сахиулах үндсэн үүрэгтэй байгууллага маань, улстөрийн их бужигнаан, нам дотроо үл ойлголцсон, туйлд хуваагдсан байгаа энэ үед гал дээр тос нэмж байгаатай адил нэг талын гишүүдийг хомроголон хөөх тухай асуудал ярьж байна гэдэг нь маш хариуцлагагүй үйлдэл болж байна. Энэ үйлдлийг хэлсэн. Зарчмын хувьд ч болохгүй, дүрэмт ч ийм заалт байхгүй. Асуудал олонхийн саналаар шийдэгддэг учир өчигдөр хэлэлцээд шийдвэр гарсан.

-Батбаатар дарга худал мэдээлэл өгсөн гэсэн үг үү?

-Би оройхон харьсан, мэдээ нөхөж үзсэн. Нэлээн сандруу, амьсгаа өндөртэй ийм асуудал болоогүй гэж ордноос мэдээлж байна лээ. Хийсэн үйлдэл, хэлсэн үгээ хэдхэн цагийн дотор буцааж байх нь улстөрчийн хувьд зохисгүй харагдаж байна лээ. Шинэ хяналтын хорооны дарга дүрэм журам баримтлахыг хичээдэггүй хүн байна лээ. Хэлээд үг авахгүй, бодлогоо дагана гэсэн юм ярьдаг.

-Өөр гишүүдийн асуудал ярьсан уу?

-Яриагүй. Тав биш зургаан гишүүний асуудлыг ярьсан. Д.Оюунхорол гишүүнийг мөн ярьсан.

-Тогтоолоосоо буцсан шалтгааныг юу гэж харж байна вэ?

-Бодвол уур амьсгалыг анзаарсан байх дээр нь чиглэл өгдөг газар байдаг бол болохгүй байна гэж хэлсэн болов уу гэж тааж байна. Лав эсрэг байр суурьтай гишүүдийн саналыг харгалзаж буцаагүй нь тодорхой.

Р.Хишигжаргал