УИХ-ын гишүүн Ж.Мөнхбат гишүүн сая чуулганы үеэр хэлсэн үгэндээ “Ж.Энхбаяр, Т.Аюурсайхан аа та хоёр Монгол Улсын шударга үнэний гоцлон дуулаачийн цангинуур цагаан хоолойнууд юм гэнэ лээ. Энэ асуудлыг хэлэлцэж байхад юу яриад хамгаалаад, өмгөөлөөд байгаа юм бэ. Монголын ард түмнийг арай дэндүү доромжилж байгаа юм биш үү. Засгийн газар, Ерөнхий сайдыг авч үлдэхийн тулд наймаа хэрээс хэтэрч байна” гэж ярьсан.

Энэ талаар Сангийн сайд Ч.Хүрэлбаатар “Үг хэлэхдээ Ж.Мөнхбат гишүүн гүтгэлгийн шинж чанартай үг тарааж байна. Хүнээс сонссон үгээ сайн нягталж байгаад тараахгүй бол ямар ноцтой байдал болдог вэ гэдгийг уг нь өөрийг чинь би ойлгосон гэж бодсон. Харамсалтай нь ойлгоогүй юм байна. Сайн нягтлах хэрэгтэй. Хоёр зүйлийг хэлье. Сангийн сайдаар томилогдоод очсон. Тэр үед төрийн мөнгө рүү арилжаагүй банкууд бүгд дайраад орчихсон байсан. Төрийн 410 тэрбум төгрөгийг арилжааны банкууд бага хүүтэй байршуулчихаад эргүүлээд өндөр хүүтэй зээлж авдаг. Зургаан хувийн хүүтэй байршуулчихаад эргүүлээд түүнийгээ 13 хувиар зээлж авдаг ийм л байсан. Үүнийг таслан зогсоосон. Одоо бүх арилжааны банкууд төрийн мөнгөнөөс савраа татацгаасан. Аж, ахуйн нэгж байгууллагын мөнгө найдвартайгаар төрийн санд Монголбанкин дээр байж байгаа. Төрийн мөнгөөр арилжааны банкууд бизнес хийдэг үйлдлийг таслан зогсоосон. Үүнийхээ горыг ч бид авч байх шиг байна. Энэ агуулгаар нь бид рүү дайрч байх шиг байна. Гэхдээ бид үүнийг цэгцлэх ажлыг зогсоохгүй. Цаашид үргэлжлүүлэн улам хийнэ. Сандарч байгаа хүмүүс байгаа л байх.

Хоёрдугаарт, “Богд Ар” ХХК-д ипотекийн зээлийг Сангийн яам олгодог гэж худлаа. Ипотекийн зээлийг Монголбанк хариуцаж байгаа. Сангийн яадаг гэхээр төсөв дээр суусан мөнгийг Монголбанк руу шилжүүлдэг. Ганц бичиг л явуулсан. Тэр нь ипотекийн зээлийг хөдөө орон нутаг руу түлхүү явуулж өгөөч гэдэг хүсэлтийг л явуулсан. У.Хүрэлсүхийн Засгийн газрыг муулах гээд нэлээд оролдож байна. Муулахдаа бодитой юман дээр муул. Худлаа зүйлийг гүтгэж ярьж болохгүй” хэмээн хариу мэдэгдсэн юм.

Түүнчлэн ЖДҮ дээр У.Хүрэлсүхийн толгойлсон Засгийн газар 2018 оны төсөв дээр огт мөнгө тавиагүй. 2018 оны төсвийг 2017 онд өргөн барьсан. 2019 оны төсөв дээр өргөн барихдаа энэ ЖДҮХС дээр мөнгө тавиагүй юм. Хоёр жил дарааллаад мөнгө тавилгүй явж ирсэн. Энэ сангийн 2012-2017 оны үйл ажиллагаан дээр нь шалгалт хийж гаргаж үзсэн. Ингээд үзэхээр ямар зөрчил гарч байна гэхээр хамгийн үр ашиггүй байдлаар энэ мөнгө олгогдож байна гэж үзсэн. Арилжааны банкаар явж байсан механизмыг 2016 оны арваннэгдүгээр сард яамд олгохоор оруулаад ирчихсэн. Ийм хоёр зүйл хийгдээд байсан. Тиймээс Жижиг, дундын сангийн зээлийн мөнгийг хамгийн зөв, оновчтой эелдгээр олгох нь зөв юм. Өөрөөр хэлбэл, татвар төлөгчдийн мөнгийг оновчтой хэлбэрээр олгох ёстой гэсэн зарчмын үүднээс бид мөнгө тавихгүй оруулж ирж байсан. Тэгэхээр үүнийг засаад явах учиртай. Төрийн сангаар орж ирж, гарч байгаа гүйлгээг Сангийн яам хянах ёстой гээд. Хэдэн арван сая гүйлгээ хийгдэж байгаа. Төсвийн ерөнхийлөн захирагч нар өөрсдөө мөнгөө хариуцна, түүндээ хяналт тавиад явах учиртай” гэв.

Б.Лхам