Монголын улс төр ойрын үед ороо бусгаа, цаг тутам ямар нэгэн дуулиант мэдэгдлүүдээр өрнөдөг болсон. Өчигдөр ч төрийн ордон улс төрийн халуун үйл явдлуудаар буцалж өнгөрөв. Өнгөрсөн 24 цагт болсон улс төрийн гол мэдэгдлүүдийг тоймлон хүргэе.

Шийтгэл

АН У.Хүрэлсүхийн Засгийн газрыг авч үлдэх талд товчлуур дарсан УИХ-ын гишүүн Ж.Батзанданг намаас хасахаар болж, гишүүн Д.Мурат, Л.Болд нарын сонгуульд нэр дэвших эрхийг нь дөрвөн жилээр хязгаарлалаа.

Эсэргүүцэгчид

УИХ-ын гишүүн Ж.Батзандан: Давтан хэрэг, хүндрүүлэх үндэслэл гэж Эрүүгийн хуульд л байдаг. С.Эрдэнэ намын дүрэм яриад байгаа юм уу, Эрүүгийн хууль яриад байгаа юм уу?

УИХ-ын гишүүн Л.Болд:Би 1990 онд Ардчилсан намд элсэж байсан юм. Коммунист нам болсныг нь мэдсэнгүй. Би намын бүлгээс гарлаа, харин намын гишүүнээрээ үлдэнэ.

Шийдвэр

ЗГХЭГ-ын дарга Г.Занданшатар:Зам, тээврийн хөгжлийн сайд Я.Содбаатар сайдаас чөлөөлөгдөх өргөдлөө өгсөн. БСШУС-ын сайд Ц.Цогзолмаа кабинетын зарчмаар ажиллаагүй учир чөлөөлөхөөр боллоо.

Зарчимч

БСШУС-ын сайд Ц.Цогзолмаа:  Би улстөрчийнхөө хувьд  өөрийнхөө гаргасан шийдвэртээ ёс зүйн хувьд  ч,  хувь хүнийхээ хувьд ч,  зарчмынхаа хувьд  ч  харамсахгүй. Засгийн газар үлдчихлээ, намайг үлдээгээч гэж хэлэхгүй..

Хожимдсон ухаарал

Зам, тээврийн хөгжлийн сайд Я.Содбаатар: Монгол Улсын хууль зөрчөөгүй ч гэсэн улстөрчийн хувьд өнөөгийн улс төрийн нөхцөл байдлыг үнэлэн, Ерөнхий сайд У.Хүрэлсүхийн хийж буй шударга ёсны тэмцэл, Монгол Улсад бугшсан нам дамжсан бүлэглэлийн эсрэг хийх энэ тэмцлийг дэмжиж ийм алхам хийж байна.

Дэмжигч

Ерөнхийлөгч Х.Баттулга Ерөнхий сайд У.Хүрэлсүхийн зарим сайдыг үүрэгт ажлаас нь огцруулах болон үүрэгт ажлаас нь чөлөөлөх тухай зөвшилцөхөөр ирүүлсэн албан бичгийг дэмжиж хариу өглөө.

Үл мартагч

УИХ-ын гишүүн Л.Оюун-Эрдэнэ: УИХ-ын дарга огцрохгүй бол парламентын хувьсгалаас халиад олон нийтийн хувьсгал руу очиж магадгүй.

С.Нацагтовуу