Засгийн газрыг огцруулах асуудалтай холбоотойгоор УИХ-ын гишүүн Л.Болд, Д.Мурат, Ж.Батзандан нарт АН-аас улс төрийн хариуцлага тооцсон. Үүний дараахан УИХ-ын гишүүн Л.Болд АН-ын бүлгээс гарна, намаас гарахгүй хэмээн мэдэгдсэн.

Л.Болдын мэдэгдэлтэй холбогдуулан АН-ын дарга С.Эрдэнээс тодруулахад тэрбээр “Хэрвээ АН-ын бүлгээс гарах гэж байгаа бол намаас гарч таарна” хэмээсэн харин бүлгийн дарга Д.Эрдэнэбат “УИХ-ын гишүүн Л.Болдын хүсэлтийг үзэхэд 26 дугаар зүйлийн 12 дугаар заалтын дагуу гэж тодотгож өгсөн байна. 26 дугаар зүйлийн 12 дугаар заалт нь гишүүд нэг бүлгээс бөөнөөрөө гарах, нөгөө бүлэгт орох тухай ойлголт юм. Тус заалтад бөөнөөрөө гараад нөгөө бүлэгт орж чадаагүй бол дахиж бүлэг байгуулахыг хориглоно гэсэн заалт бий. Л.Болд гишүүний бичиг хуулийн заалттай нийцэхгүй байна. Тиймээс Улсын дээд шүүхэд тайлбар явуулж байгаа. Яагаад гэвэл өнөөдөр АН-аас УИХ-д сууж байгаа Л.Болд гишүүн бол АН-ын гишүүн мөн. Тиймээс албан ёсоор УИХ-ын хуулийн дагуу АН найман хүний бүрэлдэхүүнтэй бүлэг үйл ажиллагаагаа явуулж байна гэж ойлгож болно. Хуулийн зөрчилтэй ийм хүсэлтэд би АН-ын бүлгийн даргын хувьд ямар ч бичиг мэдэгдлийг УИХ-ын даргад өгөхгүй. Ийм үндэслэл байхгүй. Би хууль зөрчих эрх байхгүй. Тиймээс цаашдаа бүлгийн үйл ажиллагаа хэвийн явна гэж ойлгож болно” хэмээн тайлбар өгсөн.

Тэгвэл УИХ-ын гишүүн Л.Болд АН-ас гарах болсоноо мэдэгдсэн бөгөөд энэ тухайгаа тэрбээр УИХ-ын дарга М.Энхболдод мэдэгдэнэ гэсэн юм.

Р.Хишигжаргал