Нийгмийн бодлого, боловсрол, соёл, шинжлэх ухааны байнгын хорооны дарга Ё.Баатарбилэгээс цаг үеийн зарим асуудлаар тодруулга авлаа.

-Өнгөрсөн долоо хоногийн УИХ-ын нэгдсэн чуулган нэлээд тасалдлаа?

“УИХ-ын чуулганы хуралдаан тасалдсан зүйл байхгүй. Чуулганаар хэлэлцэгдэх асуудал УИХ-ын даргын зөвлөлөөр хэлэлцэгдэж дарааллынхаа дагуу явж байгаа. Харин үүний өмнөх долоо хоногт ХХААХҮ-ийн сайдын асуудлыг хэлэлцэхэд АН-ын бүлэг Ерөнхий сайдыг орж ирсний дараа асуудлыг хэлэлцэнэ гэж завсарлага аваад хэлэлцэх асуудал хойшилсон. Үүнээс бусад асуудал горимоороо явж байгаа.

-Өнгөрсөн долоо хоногийн чуулганы ирц бүрэн байхад УИХ-ын дарга М.Энхболд орж ирээгүй. Орой бүх гишүүд явсны дараа чуулганы танхимд орж ирээд “Ирц хүрэхгүй байгаа учир чуулганыг хаалаа” гэсэн мэдээлэл байна. Мөн зураг яваад байсан. Та чуулганы танхимд орой байсан уу, энэ мэдээлэл хэр үнэн зөв мэдээлэл юм бэ?

“Би УИХ-ын чуулганд бүрэн суудаг. Өглөө чуулган хуралдахад УИХ-ын гишүүн С.Бямбацогт “Ёсзүйн дэд хороо хуралдах шаардлагатай байна” хэмээн завсарлага хүссэн. Үүний дагуу УИХ-ын чуулган завсарласан. Миний ойлгосноор Ёсзүйн дэд хорооны ирц хүрэхгүй байснаас чуулган хуралдалгүй нэлээн хүлээсэн байх. Намайг оройны 6, 7 цагийн үед чуулганы танхимд сууж байхад 10-аад гишүүн сууж байсан УИХ-ын дарга орж ирээд “Ёсзүйн дэд хорооны хуралдааныг хүлээсээр байгаад чуулган хуралдаж чадсангүй” гэдэг тайлбар хийж чуулганы хуралдааныг өндөрлүүлсэн шүү дээ.

-Хоосон танхим байгаагүй юм уу. Тийм зураг сошиолаар яваад байсан шүү дээ?

-Тэр зураг чинь гэрэлтэй өдрийн зураг байна лээ. Орой нэлээн хэдэн гишүүн байсан. Тухайлбал Н.Цэрэнбат сайд, Ч.Улаан, Т.Аюурсайхан, Д.Сарангэрэл сайд гээд 10-аад гишүүн байсан.

-УИХ-ын гишүүн Л.Оюун-Эрдэнэ “Цензургүй яриа” нэвтрүүлэгт орохдоо УИХ-ын дарга М.Энхболд гэдэг хүн Б.Хурцын элчин сайдаар томилохдоо хаалттай хэлэлцэж томилсон” гэж ярьсан. УИХ-ын дарга өөрөө хүсэх юм бол чуулганыг хаалттай хуралдуулах болдог юм уу?

-БНСУ-д суух онц бөгөөд элчин сайдыг томилох хуралдааныг би санж байна. Элчин сайдыг томилдог Гадаад бодлого, аюулгүй байдлын байнгын хороо хаалттай хуралдсан юм байна лээ. Тэгээд чуулганы нэгдсэн хуралдаанд оруулж ирэхэд байнгын хороодын гишүүдээс санал гарсан. Миний санж байгаагаар УИХ-ын гишүүн Н.Энхболд, О.Баасанхүү хоёр энэ асуудлыг нээлттэй хэлэлцэж болохгүй яагаад гэвэл байнгын хорооны хуралдаанаар Б.Хурц элчин сайдын асуудлыг хаалттай горимоор хэлэлцсэн тиймээс чуулганы хуралдааныг хаалттай хэлэлцэх нь зүйтэй гэсэн горимын санал гаргасан. Тус горимын саналаар санал хурааж хаалттай хэлэлцсэн юм билээ. Үүнийг хэвлэл мэдээллийн байгууллагууд мэдэж байгаа байх. Би Гадаад бодлого, аюулгүй байдлын байнгын хорооны гишүүн биш болохоор болсон процессыг ярьж байна.

-Бойкот үргэлжилнэ. М.Энхболд УИХ-ыг даргалах юм бол УИХ-ын гишүүд хуралдаанд суухгүй гэж Л.Оюун-Эрдэнэ хэлсэн. Тэгэхээр энэ долоо хоногийн чуулган хуралдахгүй гэсэн үг үү?

-Хувь гишүүн байр сууриа илэрхийлэх нэг хэрэг. Би маргааш чуулганы хуралд сууна. УИХ-ын чуулган бол хуулиар зохицуулагдсан тодорхой дэгтэй тэр дагуу үйл ажиллагаагаа хэвийн үргэлжлүүлэх байх гэж бодож байна. Ер нь улс төрийн нөхцөл байдлаас болоод сүүлийн хоёр гурван чуулган дараалж Засгийн газрын өргөн мэдүүлсэн асуудлаар сайд нар нь өөрсдөө орж ирэхгүй, сайд нар нь тодорхой асуудлаар байр сууриа илэрхийлэхгүй ирц бүрдүүлэхгүй байх асуудал гарлаа. Ийм байж болохгүй. УИХ, парламентын үйл ажиллагаа жигд хэвийн үргэлжлэх ёстой. Өөрсдийн хэлэлцүүлэхээр оруулсан, өргөн мэдүүлсэн асуудлаа биечлэн сууж хэлэлцүүлэх учиртай.

Эх сурвалж: Зариг.мн