АН-ын бүлгийн дарга Д.Эрдэнэбатаас цаг үеийн асуудлаар тодрууллаа.

-Улс төрд үүсээд байгаа өнөөдрийн нөхцөл байдлыг та хэрхэн дүгнэж байна?

-"Нийгэмд үзэл бодлоороо зайлшгүй ялгарах цаг нь болсон. АН бол баруун төвийн нам зах зээлийн эдийн засгийг дэмждэг, хувь хүний үзэл бодлыг хүндэлдэг, хүний эрх чөлөө үнэт зүйлээ дахин баталгаажуулах ёстой, төрийн оролцоо дэд орооцрог хязгаарлах ёстой гэдэг намын байр сууриа дахин нотолж байгаа. Бид үзэл баримтлал бодлогоороо явна. Өнөөдрийн улс төрийн үйл явцыг улс төрч хоорондын тэмцэл явж байна уу гэж харж байгаа. Намуудын үзэл бодол хоорондын уралдаан огт байхгүй болсныг буруу хэмээн харж байна. Тиймээс АН бодлогын нам болж хувирч байгаа гэж ойлгож болно.

-Л.Болд гишүүний асуудлыг яаж шийдэх вэ?

-Л.Болд гишүүн намаас татгалзах өргөдлөө намын төв хороонд өгсөн. Намын дүрмээр тухайн холбогдох байгууллага 30 хоногийн дотор шийдвэрлэх ёстой. Үүний дараа асуудал хэрхэн явахыг шийдэнэ.

-АН бүлэггүй боллоо гэж ойлгож болох уу?

-АН-ын бүлэг өнөөдөр үйл ажиллагаагаа үргэлжлүүлж байгаа. Л.Болд гишүүний асуудлыг намын төв байгууллага яаж шийдэхээс асуудал үүснэ. Хэрвээ бүлэг наймаас доош гишүүнтэй болох юм бол АН бүлэггүй болох эрсдэл байгаа.

-Л.Болд гишүүнийг шүүхэд өгсөн гэсэн мэдээлэл байна. Энэ үнэн үү?

-Л.Болд гишүүнийг шүүхэд өгөөгүй. Аливаа мэдэгдэл, тайлбарыг мушгин гуйвуулж болохгүй. Л.Болд гишүүний их хурал дахь бүлгийн асуудлыг шийдэхэд УИХ-ын хуульд тодотгох зүйл зайлшгүй гарлаа. Тиймээс УИХ-ын хуульд тодотгох зүйл зөрчилдөөнтэй байгаа учраас Улсын дээд шүүх энэ талаар тайлбар хийж өгөөч гэж хэлсэн. Гишүүдийг бүрэн эрхийн асуудлаар шүүхэд өгдөг нам гэж хаана ч байхгүй.

-Л.Болд гишүүний хүсэлтийг АН хүлээж авахгүй байх боломжтой юу?

 -Төв нам өөрийн шийдвэрээ гаргах үүрэгтэй. Ямар шийдвэр гаргахыг бид мэдэхгүй шүү дээ. Энэ бол намын асуудал.

-Бүлэггүй болвол УИХ хяналтгүй болох эрсдэл үүсэх үү?

-Бүлэггүй болоход хяналгүй болох эрсдэл байхгүй. АН гишүүд УИХ-д байна. Тиймээс өөрийн үзэл бодол, итгэл үнэмшлээ илэрхийлээд эрх баригчдын болохгүй байгааг шүүмжлэх гишүүд байгаа учраас ямар ч нөхцөл байдалд бид үйл ажиллагаагаа үргэлжлүүлээд явна.

-Хуулийн талаас ямар тодорхойгүй зүйл байгаа учраас Дээд шүүх тайлбар хийх ёстой гэж үзэж байгаа юм бэ?

-Хуульд Л.Болд гишүүний өөрийн хүсэлтэд тусгасан заалт нь гишүүдэд хамааралтай заалт бий. Нэг гишүүн намын бүлгийн гишүүнээс татгалзахад ямар хуулийн заалтаар шийдвэрлэх нь тодорхойгүй байна. Өнөөдөр УИХ дахь АН-ын бүлэг улс төрийн нам татан буугдаагүй байхад энэ байж болох нөхцөл мөн үү гэдгийг тодорхой болгож өгөөч гэсэн тайлбарыг хүссэн.

-УИХ-ын даргыг огцруулах асуудлыг та хэрхэн дүгнэж байна. Танай намын хоёр гишүүн байгаа?

-УИХ-ын даргыг огцруулах асуудал эрх баригчдын тухай асуудал цөөнхийн асуудал биш. 65 суудалтай ард түмний итгэлийг авсан нам өөрсдөө УИХ-ын даргыг сонгосон. Тэр байтугай энэ хүнийг ерөнхийлөгчийн сонгуульд нэрийг нь дэвшүүлсэн шүү дээ. Дотроо учраа олох асуудлыг төрийн үймээн болгож болохгүй.

Р.Хишигжаргал