Өнгөрсөн 11 дүгээр сарын 22-ны өдөр төрийн албаны шалгалт хийхээр явж байсан дөрвөн албан хаагч Завхан аймгийн нутаг Солонготын даваа орчим осолдсон харамсалтай явдал болсон билээ. Эх сурвалжийн мэдээлж буйгаар осолд орсон хүмүүс дунд ЗГХЭГ-ын нэг, Сангийн яамны хоёр мэргэжилтэн, Засгийн газрын авто баазын жолооч нийлсэн дөрвөн хүн байсан бөгөөд гурав нь эрэгтэй, нэг нь эмэгтэй байсөн бөгөөд эмэгтэй нь ухаан ороогүй байна хэмээн тухайн өдрийн цагдаагийн рапортод тэмдэглэсэн байдаг.
Уг шалгалтыг ЗГХЭГ-ын дарга Г.Занданшатарын санаачилсан гэгддэг. Харин ажлын хэсгийг ЗГХЭГ-ын Тэргүүн дэд дарга Г.Баясгалан даргалж байгаа аж.
Осол эндэгдэл гэнэт л тохиолддог зүйл. Гэсэн хэдий ч өнөөдрийг хүртэл осолдсон албан хаагчдын биеийн байдлыг асууж, нөхцөл байдалтай танилцсан албан тушаалтан нэг ч байхгүй нь харамсалтай.Тэд өгсөн тушаалын дагуу яваад осолдсон. Харин тэднийг эмнэлэг баруудуулан орхисон тухай ч яригдав.
“Төрийн албан хаагчийн шалгалтаа өгөөд төрийн албанд тэнцэж, тангаргаа өргөчихсөн алба хаагчдаас дахин шалгалт авч аттестатчилал явуулж буй нь хуулийн дагуу бус” гэж УИХ-ын дарга М.Энхболд хэлсэн юм.
Түүний хэлдэг зөв. Төрийн албанд тэнцсэн, тангаргаа өргөчихсөн албан тушаалтнаас дахин шалгалт авна гэдэг тэнэг хэрэг. Өнөөх дөрвөн жил багш мэргэжлээр сурчхаад байхад нь багшлах эрхийн шалгалт авдаг шиг л зүйл болоод байгаа юм.
Г.Занданшатар, Г.Баясгалан нарын өгсөн үүргийг биелүүлэх гэж яваад осолд орсон төрийн албан хаагчдын ойр дотнынхон гомдолтой байгаагаа цахим хуудастаа бичив. “Үнэхээр хууль бус, зохион байгуулалтгүй энэ шалгалтаас болж хайран сайхан найз минь эмнэлгийн орон дээр үхэл амьдралтай тэмцээд хэвтэж байна. Энэний хариуцлагыг хэн хүлээх вэ. Эмнэлэг бараадуулсан болоод сандал ширээнийхээ тэмцлийг хийгээд таг. Хүнээ хайрладаг төр засаг гэж ер нь байна уу” гэхчлэн асуужээ.
Осолдсон албан хаагчдын биеийн байдал ямар байгааг Төрийн албаны зөвлөлөөс асуусан ч хариу өгсөнгүй. Тэд юу нуугаад ийн чимээгүй байгааг бүү мэд. Ямартай ч хүн эндээгүй л бол болох нь тэр.
“Төрийн албаны сахилга хариуцлага, дэг журмыг чангатгах тухай” Засгийн газрын 2018 оны 258 дугаар тогтоолоор төрийн жинхэнэ албан хаагчийн үйл ажиллагааны үр дүн, мэргэшлийн түвшинг үнэлэх ажлыг 2018 онд багтаан зохион байгуулахыг Засгийн газрын Хэрэг эрхлэх газарт даалгаж, Төрийн албаны зөвлөлд зөвлөсний дагуу төрийн жинхэнэ албан хаагчийн үйл ажиллагааны үр дүн, мэргэшлийн түвшинг үнэлэх ажлын хэсгийг ЗГХЭГ-ын тэргүүн дэд дарга Г.Баясгалан ахалж байгааг дахин нэг сануулъя. Харин санаачлагч нь ЗГХЭГ-ын дарга Г.Занданшатар гэгдээд байгаа.
Нэг сум дээр жишээ татъя. Төрийн албаны шалгалт ирэх сургаар бичиг цаасаа эмхэлж, өрөө тасалгаагаа цэвэрлэж, ном шагайх зэргээр бөөн үймээн болох нь тэр. Зарим нь ажлын байран дээрээ нойргүй хонох тохиолдол бий. Мэдээж энэ хугацаанд шалгалтдаа бэлтгэхээс эхлүүлээд халчих болов уу гэсэн айдас албан хаагч бүрт л байгаа. “Шалгалт ирнэ” гэх үг хэвийн явж байсан нэг сумын захиргааны ажлыг хэдэн өдөртөө л зогсоож орхидог нь үнэн.
Үнэхээр л Төрийн албаны тухай шинэ хуулийг хэрэгжүүлэх гэж байгаа бол Монгол Улсынхаа таван бүсээс тус бүр нэг аймаг, нэгээс хоёр яам, энэ тооны дүүргийг сонгоод шалгалт явуулахад болох байсан шүү дээ.
Энэ бүхний эцэст тушаал өгч явуулсан албан хаагчиддаа анхаарал тавих хэн ч байсангүй. Анхаарал тавихгүй байж болно. Гэвч ЗГЭХГ-ын тэргүүн дэд дарга Г.Баясгалан, ЗГХЭГ-ын дарга Г.Занданшатар нар яагаад юу ч дуугарахгүй байна вэ.
Уг нь өнөөдөр ардчилсан нийгэм биш билүү. Дайн дажинтай цагт л цэрэгтээ тушаал өгсөн л бол түүний үхэх, шархдах хэнд ч падгүй байсансан.
Энэ хоёр эрхэм хэдийг хүртэл дүлий дүмбэ оргихыг харж л байя. Хэрвээ тэдгээр төрийн алба хаагчдад ямар нэгэн муу зүйл болбол хатуу хариуцлага хүлээхийг нь сануулж байна.
Л.Сайнаа
Сэтгэгдэл (11)