УИХ дахь МАН-ын бүлгийн өнөөдрийн хуралдаанаар Зам тээвэр хөгжлийн сайд ёсзүйн хариуцлага хүлээж ажлаа өгөх мэдэгдэл болон Ерөнхий сайд зүгээс БСШУС-ийг сайдыг огцруулах холбоотой асуудал, мөн Алт олборлогч нарт оногдуулдаг татварын хувь хэмжээ 2,5 хувьтай байгааг үргэлжлүүлэн таван жилээр сунгах зэрэг гурван асуудлыг хэлэлцжээ.

Бүлгийн хуралдааны талаар УИХ-ын гишүүн Х.Нямбаатараас дараах зүйлийг тодрууллаа.

-Дараагийн сайдад ямар хүмүүсийн нэр яригдаж байгаа юм бэ. Хэзээ оруулж ирэх бэ?

-Энэ талаар ямар ч мэдээлэл алга байна. Ерөнхий сайд өөрөө энэ талаар албан ёсны мэдээлэл өгөх байх. Ер нь ХХААХҮ-ийн сайд, БСШУС-ийн сайд, ЗТХ-ийн сайд нарын асуудал яаралтай орж ирэх ёстой. Засаг, төрийн үйл ажиллагаа хэвийн тогтвортой үргэлжлэх ёстой гэж бодож байна.

-Бүлэг хэдэн гишүүнтэй хуралдсан бэ?

-52 хувийн ирцтэй эхэлж, 64 хувийн ирцтэй асуудал хэлэлцсэн.

-Бүлгийн эв нэгдлийн талаар ярьсан болов уу?

-Энэ талаар огт яригдаагүй. УИХ-ын чуулганыг бойкотлох нь УИХ-ын гишүүдийн асуудал. Үндсэн хуулиар Засгийн газрын гишүүн, УИХ-ын гишүүн гэсэн чиг үүрэгтэй байх боломж нээлттэй байгаа. УИХ-ын нэр бүхий 30-иад гишүүн чуулганы хуралдаанд оролцохгүй УИХ-ын даргыг өргөдлөө өгөхийг шаардсан байгаа. Энэ бол Засгийн газрын гишүүн агуулгаар бус УИХ-ын гишүүд УИХ-ын чуулганд оролцохгүй гэдгээ илэрхийлсэн байгаа.

Р.Хишигжаргал