УИХ-ын чуулганы хуралдаан өчигдөр мөн л ирц хүрээгүй гэх шалтгаанаар хуралдаж чадаагүй. Өмнөх долоо хоногуудад ч хуралдаагүй. Өчигдөрийн чуулганы ирц 45.3 хувьтай байсан.  Нөгөө чуулгандаа байнга суудаг гэх ард түмний хүү С.Жавхлан гишүүн хүртэл байхгүй. УИХ-ын дарга нэг нэгээр нь чуулгандаа ирж, асуудлаа хэлэлцэж, шийдвэрлэнэ үү гээд нэр цохон дуудаж байна билээ.

Чадна, хийнэ, бүтээнэ гэж ард түмнээс сонгогдож гарчихаад “бүдүүн” царайлаад явцгаах юм. Яасан бөх зүрхнүүд вэ. Ингэж хэлэх шалтгаан байна. Явуулах нэгнээ явуулаад хурдан ажлаа эхлэвэл дээрсэн. Чуулган тасалдаг, хүнд сурталтай та нөхдүүдийг ард түмэн чинь сонгосон шүү. Даргаа солино уу, яана уу хамаа алга. Хуралдаа суухгүй байгаа гишүүдийг сонгогчид нь "эсэргүүцье". Ард түмний эрх ашгийн төлөө ажиллана гэж төрийн түшээгээр сонгогдсон ч албан тушаалын хэрүүл талцлаас хэтрэхгүй байгааг  бүгд харж байгаа. Шунал ихэдвэл, шулам болно гэх өвгөдийн сургааль ийн аж. Төрд шургалсан ЖДҮ-чин, концессчин, тендерчин нөхдүүдэд зориулж хэлсэн үг мэт.

УИХ бол өөрөө хууль баталдаг, төрийн дээд удирдлага мөн. УИХ-ын хэн хэн гишүүн гэдэг нь тодорхойгүй ч 40 гишүүн УИХ-ын даргыг огцрохгүй бол хуралдаа суухгүй гэж байгаа. Гэтэл УИХ-ын 40 гишүүн чуулганы хуралдаа суухад л ирц бүрдээд явчихна. Уг нь энэ дөчид хуулийн төслөө өргөн бариад хуулиа засварлачих бүрэн боломж нь байна. Төрийн ажлыг гацаахгүй байх боломж гэсэн үг. Учир нь хуулинд УИХ-ын даргыг хэн нэгэн албан тушаалтан огцруулах зүйл заалт байхгүй гээд байгаа шүү дээ. 75 гишүүн 75-уулаа огцруулах гарын үсэг зураад ч огцрохгүй гээд байгаа. Тийм юм бол хуулиа санаачил л даа. Ингэж чадахгүй бол зүгээр л ажлаа хийсэн нь дээр шүү дээ. Төрийн ажлыг битгий ингэж гацаагаач ээ эрхэм гишүүд ээ. 

Түүнчлэн ард түмэн ингэж хүсч байна зэрэг үгээр нэрийг нь түрий барьдагаа больцгоох хэрэгтэй. Явуулахыг нь явуулаад хүлээгдэж буй чухал асуудлуудаа шийдвэрлэх хэрэгтэй байна. Тухайлбал, утааны асуудал хэцүүдлээ шүү дээ. Дэлхийд утаа ихтэй хотоороо гуравдугаарт ороод байгаа. Гэтэл утаанд зарцуулсан мөнгөний хэмжээ 557 тэрбум төгрөг. Утаагаараа дэлхийд ингэж гайхагдаж, дээгүүр цохиж явна. Дээрээс нь зарим яамдууд сайдгүй удлаа. Толгойгүй ингээд л байж байг уу. Чуулгандаа суухгүй гэж байгаа бол сонгогчдын төлөөлөл байхаас татгалзаж байна гэж ойлгож болох юм уу. 

Хууль тогтоох дээд байгууллага нь Үндсэн хуулиас харш юм яриад байж байвал хэн энэ хуулийг даган мөрдөх юм бэ. УИХ-ын гишүүд өөрсдөө Үндсэн хууль, УИХ-ын тухай хуулиа зөрчөөд байна гэж цөөнгүй хуульч үзэл бодлоо илэрхийлээд байгаа. Гишүүн гэхээр л дур зоргоороо аашилж, төрийг бойкотлож болдог гэж ойлгоод байгаа юм биш биз. Дахин хэлье ард түмний төлөөлөл болж сонгогдсон шүү та  эрхэм түшээд минь...

Б.Лхам