Хөдөлмөр нийгмийн хамгааллын сайд С.Чинзориг мэдээлэл хийлээ.

С.Чинзориг сайд “Засгийн газрын өнөөдрийн хуралдаанаар агаарын бохирдол ихтэй бүст амьдарч буй жирэмсэн болон 0-5 насны хүүхэдтэй эхчүүдийг цэвэр агаарт амраах асуудлыг хэлэлцсэн” гэдгийг хэллээ.

Тэрбээр цааш нь ярихдаа “Ерөнхий сайдаас жирэмсэн эхчүүд болон бага насны хүүхэдтэй ээжүүдийг утааны улиралд Улаанбаатар хотын ойр байгаа амралт, сувилалын газарт гарах үүрэг өгсөн. Үүний дагуу өнөөдөр холбогдох саналаа боловсруулж, Засгийн газарт танилцууллаа. Нийслэлийн агаарын бохирдолд ихтэй бүсүүдэд нийт 50 мянган хүүхэд, 11 мянган жирэмсэн эх бий. Эдгээр хүмүүсийг дунджаар энэ сарын 25-наас гуравдугаар сарын 15-ны хооронд таван хоногт цэвэр агаарт амраахад нийт найман тэрбум төгрөг шаардлагатайгаас нэг тэрбумыг нь Эрүүл мэндийн даатгалын сангаас, үлдсэнийг нь Нийгмийн халамжийн сангаас гаргахаар төлөвлөж байна. Энэ асуудлыг баасан гарагт Засгийн газрын ээлжит бус хуралдаан зарлаж, эцэслэн шийдвэрлэхээр болсон. Өнөөдөр Сангийн яам, ЭМЯ болон ХНХЯ хамтран тогтоолын төсөл боловсруулах болно. Эхний ээлжид агаарын бохирдол ихтэй бүсэд амьдарч байгаа жирэмсэн болон бага насны хүүхэдтэй ээжүүдийн тоог нарийвчлан гаргана. Хоёрдугаарт, ЭМДС болон Нийгмийн халамжийн сантай хамтран ажилладаг амралт, сувилалын газруудын тоог гаргах юм” гэв.

Мөн хуралдаанаар жирэмсэн ээж болон 0-5 насны хүүхдүүдэд хүчил төрөгчийн коктейл өгөх санал яригдсан байна. Гэвч энэ нь үр дүнгүй арга хэмжээ хэмээн үзсэн байна.

Р.Хишигжаргал