УИХ-ын гишүүн Л.Оюун-Эрдэнэ, Т.Аюурсайхан, Ж.Батзандан, Л.Болд нар УИХ-ын дарга М.Энхболдыг албан тушаалаасаа огцрохыг шаардаж, 48 цагийн хугацаа өгч буйгаа өчигдөр мэдэгдсэн. Тэдний хэлснээр энэ хугацаанаас хэтэрвэл орон даяар эсэргүүцлийн жагсаал хийнэ гэж олон нийтийг турхирсан маягтай мэдээлэл хийсэн юм. Өнгөц харвал, үнэхээр нэг хүний албан тушаалаас илүүтэй төрийн ажлыг дээдэлсэн мэт. Гэвч начир дээрээ “Ард түмэн” гэж уриалдаг дээрх гишүүд жагсаал цуглаан хийх зөвшөөрлөө Төрийн ордноос лүндэн буулгах замаар авч буй сурагтай. Тодруулбал, “Жагсаал, цуглаан хийх журам”-ын дагуу тухайн дүүргийн удирдлага болон холбогдох байгууллагад өөрийн биеэр хүсэлт гаргаж, зөвшөөрөл авч байж, жагсаал цуглаан хийдэг журамтай. Гэтэл ард түмний төлөөлөл болж, Төрийн ордонд заларсан Л.Оюун-Эрдэнэ, Т.Аюурсайхан, Ж.Батзандан, Л.Болд гишүүд Тагнуул, Цагдаагийн дарга нарыг Төрийн ордон дахь өрөөндөө дуудаж, өмнөө суулгачихаад “зөвшөөрөл өг” гэж дарамталж буй аж. Тэд ард түмний төлөөлөл болж УИХ-д сонгогдсон. Тиймээс ард түмний дуу хоолойг төрд хүргэх үүрэгтэй. Гэтэл “ард түмэн” гэдэг “зэвсэг”-ийг өмнөө барьчихаад тагнуул, цагдаагийн газрын дарга нарыг дарамтлах нь хэр зохистой хэрэг бэ. Хэрэв зээ, хэн нэгэн энгийн иргэн холбогдох байгууллагаас зөвшөөрөл авалгүйгээр жагсаал, цуглаан, суулт хийвэл ачигддаг номтой. Нөгөөтэйгүүр, УИХ-ын даргад 48 цагийн хугацаа өгч дарамталдаг гишүүд энэ зэргийн зөвшөөрлийг хууль бусаар гаргуулах нь арга ч үгүй биз. Хамгийн гол нь гишүүд Төрийн ордоноос энэ эрхийг хуруугаа хөдөлгөх төдийхөнд жагсаал хийх зөвшөөрөл авчихдаг юм байна. Тэдний эл увайгүй үйлдэлд ард түмэн нэрвэгдэх вий дээ гэсэн айдас эрхгүй төрсөн нь юуун.

Г.Алимаа