УИХ-ын чуулганы өнөөдрийн нэгдсэн хуралдаанаар цаг үеийн нэн шаардлагатай 20 асуудал хэлэлцэхээр төлөвлөөд байсан ч зургаа дахь удаагаа хойшиллоо. Учир нь УИХ-ын дарга М.Энхболдыг огцрох хүртэл чуулганы хуралдаанд суухгүй гэдгээ УИХ-ын зарим гишүүн илэрхийлсэн билээ.

Өнөөдрийн хувьд УИХ-ын чуулганд 32 гишүүн хүрэлцэн ирсэн бөгөөд 42.7 хувийн ирцтэй байв.

Чуулганы индэр дээрээс УИХ-ын дэд дарга Л.Энх-Амгалан хэлэлцэх шаардлагатай хугацаа тулгамдсан хуулийн төслүүд байгааг сануулсан юм. Тухайлбал, 2019 оны нэгдүгээр 1-нээс эхлэн Төрийн албаны тухай хууль хэрэгжиж эхэлнэ. Уг хууль хэрэгжиж эхлэхэд Төрийн албаны зөвлөлийн үйл ажиллагааны дүрэм батлах тухай УИХ-ын тогтоол батлагдах ёстой. Мөн Төрийн зарим албан тушаалтны ангилал зэрэглэлийн тогтоол батлагдах шаардлагатай байгааг УИХ-ын дэд дарга танилцууллаа.

Ийнхүү УИХ-ын чуулганы нэгдсэн хуралдааны ирц бүрдээгүй тул УИХ-ын дэд дарга Л.Энх-Амгалан “Ард иргэдээс чуулганыг тасалж байгаа гишүүдэд хариуцлага тооцох ёстой гэсэн байр сууриа илэрхийлж байгаа. Тиймээс УИХ-ын дэгийн тухай хуулиар цалингаас нь хасах зохицуулалт хийж байгаа. Ингээд өнөөдрийн чуулганы нээгдэж чадсангүй. Ард иргэдээсээ хүлцэл өчиж байна” гэсэн юм.

Г.Алимаа