УИХ-ын гишүүн, АН-ын дарга С.Эрдэнэ цаг үеийн асуудлаар мэдээлэл хийлээ.

Тэрбээр “Ерөнхий сайд У.Хүрэлсүхэд асуулга тавьж байна. Улс орны өмнө хүлээсэн үүргээ биелүүлэхээсээ илүү үнэн шударга баатар дүрд орж Монгол хүний хувь заяагаар тоглож дуусч байна. Тиймээс хатуу шүүмжлэл хэлье. Өнөөдөр маш их мөнгө зарж улс төрийн янз бүрийн үйлдэл зохион байгуулж байгаад харамсаж байна. Өнөөдөр та бүхэнд 2019 оны улсын төсөв батлагдсан. Төсөв 1.9 их наяд төгрөгийн алдагдалтай батлагдсан. Энэ оны хүлээгдэж буй гүйцэтгэлээр 1.3 их наяд төгрөгийн давсан орлоготой байхаар төлөвлөсөн. Харамсалтай нь сая Японы Засгийн газар буюу ОУВС-аас санхүүжих ёстой байсан сүүлчийн ээлжийн мөнгийг энэ засгийн газар авч чадаагүй. Үүнээс болоод бидний төлөвлөж байсан гурван их наядын давсан орлогын 600-аад тэрбум төгрөгийн эх үүсвэргүй боллоо. Нүүрсний гол импортлогч Хятад орон хязгаарлалт тавьж байгаа.  Өнөөдөр юун МАН-ын дотоод зодоон бэ. МАН-ын дарга У.Хүрэлсүх яагаад 64 гишүүнээ зангидаж чаддаггүй, төрийг гацаагаад, өөрийгөө үнэнч шударгын баатар мэтээр магтуулаад байна вэ? У.Хүрэлсүхийг шүүмжлэхээр хамгаалагчид нь хир халдаахгүй улайрч байна. Монголын ард түмэн туйлдлаа. Гадуур өргөн хэрэглээний бараа бүтээгдэхүүн хэд дахин өсч, утаа 21 аймагт бий болж, Монгол үндэстний аюулгүй байдал алдагдлаа. Алтан цээжтэй, мөнгөн бөгстэй Ерөнхий сайдтай болчихсон. Тиймээс би Ерөнхий сайд У.Хүрэлсүхэд асуулга хүргүүлж байна. Хуулийн хугацаанд нь хариулж өгөөч. Танай намын хагарлаас болж Монгол төр гацлаа. Засгийн газрын гишүүд нь УИХ-ын хуралдаандаа суухгүй, УИХ-ыг бойкотлоод сууж байна.

Хүүхдийн мөнгийг ялгаваргүй олгоно, өрийг өрөөр дарахгүй, ахмад настны тэтгэврийг нэмнэ гэсэн яасан бэ. Намайг юу ч гэж доромжилж болно. Би сөрөг хүчний намын даргын хувьд үгээ хэлнэ.У.Хүрэлсүхийн гайхуулаад байгаа ажил хаана байна. Нефть боловсруулах үйлдвэрийг З.Энхболдыг УИХ-ын дарга байх үед Энэтхэгийн Ерөнхий сайд Моди ирж, санхүүжилт хийсэн юм. У.Хүрэлсүх санхүүжилт орж ирээгүй юм. УИХ нь хуралдаж чадахгүй байхад яаж Засгийн газар ажиллах юм. Улс төрийн хийрхлээсээ салцгаа. МАН дотоодын зөрчлөө нам дотроо шийд. “60 тэрбум”, ЖДҮ нар нам дотроо шийд, битгий Монгол төрийг бузарлаад бай. Улс төрийн талцал “60 тэрбум”, ЖДҮ гэж явагдаж байна. Өчигдрийн жагсаал юу ч шийдэж чадахгүй байна.  У.Хүрэлсүх гэдэг Ерөнхий сайдад энэ асуулгыг тавьж байна. Шатахууны үнийн өсөлт, хүүхдийн эндэгдэл, агаарын бохирдолтой тэмцэх ажлаа хий. Хийж чадахгүй бол танай нам татан буугд. Ямар ч хууль баталсан та нарт эрх нь байна. Эрхээ хэрэгжүүлээд яв. У.Хүрэлсүхийн эсрэг үг хэлдэг хүн байхгүй болсон. Үг хэлсэн хүн доромжлуулдаг. Надад бол айгаад байх юм байхгүй, намайг яаж ч ухаа хятад цус, гэмт хэргийн шинжтэй идсэн уусан үйлдэл гарахгүй. Тийм учраас би АН-ын даргын хувьд энэ асуулгыг тавьж байна. Энэ намын зодоонд монголчууд оролцохоо больё. АН цаашид ч сөрөг хүчний үүргээ гүйцэтгэнэ. Болохгүй бол цаашид АН-аас МАН-ыг татан буулгах асуудлыг тавина” гэв.

Р.Хишигжаргал