УИХ-ын өнөөдрийн нэгдсэн хуралдааны үеэр МАН-ын бүлгийн дарга Д.Тогтохсүрэн бүлэг хуралдуулсны дараа чуулганыг хуралдуулах горимын санал гаргасны дагуу завсарлага авсан. Энэ талаар  УИХ-ын гишүүн Д.Хаянхярваагаас тодрууллаа.

-Д.Тогтохсүрэн гишүүн ямар учраас бүлэг хуралдсны дараа чуулган хуралдуулах санал гаргасан юм бол. Чуулган өнөөдөр хуралдах болов уу?

-Сайн хэлж мэдэхгүй байна. Миний харснаар бүлгийн дарга нөгөө хэдтэйгээ уулзах гээд байна уу гэж ойлголоо. Ер нь бол бүх юм хэрээс хэтэрлээ. УИХ-ын чуулган хуралдах ёстой. Бидний 27 гишүүн чуулганы хуралдаа сууж байна. УИХ хуралдахгүй байна гэдэг өөрөө асуудал. Яг үнэндээ Засгийн газрын гишүүд хуралдаа суухад л болно. Засгийн газрын гишүүд хууль бус бойкот зарлаад ингээд явж байх нь арай дэндэж байна. Зарчим ярьвал төрийн дээр нам гарчихаад цовхчиж байна. Би намын гишүүний хувьд "Хуралдаа ор"  гэж шаардаж байна. Битгий суу гэдэг талд би зогсохгүй. Төрийн дээр нам сандайлж суучихаад хууль бус бойкот зарлаж, чуулганыг гацаах нь дэндүү увайгүй, ёс зүйгүй асуудал. Надад хууль зөрчсөн асуудал байхгүй гэхээр "Чи ажлаа өг" гэж шахах, шаардаж болохгүй. Ер нь УИХ-ын даргыг нэг хэсэг нь "Таалагдахгүй байна. Чи яв" гэж шахаж явуулдаг асуудал бий болвол дараагийн парламентад ийм жишиг бий болчих вий гэж бодож байна. Хэсэг бүлэгт нь таалагдахгүй болохоор бойкот зарлаад, УИХ-ын даргыг огцруулж байж хуралдаа сууна гэдэг буруу жишиг рүү орчих вий гэсэн болгоомжлол бий. "Хүн хэлээрээ мал хөлөөрөө" гэдэг. Эрх биш ойлголцох байлгүй дээ.

                                                                                                                                Р.Хишигжаргал