Монгол Улсын Ерөнхийлөгч УИХ-ын тухай хууль болон УИХ-ын Дэгийн тухай хуульд өөрчлөлт оруулах тухай хуулийн төслийг УИХ-ын даргад өргөн барьсан. Үүнтэй холбоотойгоор АН-ын бүлгийн дарга Д.Эрдэнэбат “Хуульгүйгээр хийгдэж байгаа бүх зүйл төрийн эрхийг хууль бусаар авах гэж байгаатай ижил сонсогдож байна. АН-ын хувьд эрх зүйт төрөө хүндэлж, өнөөдрийг хүртэл хууль сахих үүргээ биелүүлж, хуралд оролцож байна. Харамсалтай нь, олон долоо хоног төрийн ажил гацлаа. Эндээс гарах хоёр л гарц байна. Нэгдүгээрт, УИХ гишүүдийнхээ саналаар өөрөө огцрох. Энэ асуудлыг бид даваа гарагт бүлгийн хурлаараа ярилцана. Хоёрдугаарт, энэ өргөн барьсан хуулийн асуудал. УИХ-ын дарга хуулийн төслийг Төрийн байгууллалтын байнгын хороонд хуулийн төслийг шилжүүллээ гэж мэдэгдсэн. Ирэх долоо хоногт мөн энэ асуудлыг бүлгээрээ хэлэлцэж шийдвэрээ гаргана. Ирэх долоо хоногт бүтэн хэлэлцээд явахад энэ хууль батлагдах боломжтой” гэв.