УИХ-ын өнөөдрийн нэгдсэн чуулганы үеэр МАН-ын бүлгээс завсарлага авах хүсэлт гаргасан. Энэ талаар бүлгийн дарга Д.Тогтохсүрэнгээс тодруулахад “МАН-ын бүлгийн үйл ажиллагаатай холбоотойгоор УИХ-ын чуулган гацаж байна. УИХ-ын 40 гишүүн УИХ-ын даргыг огцрох нь зүйтэй гэж үзэж, хурал удирдах ёс зүйн эрхгүй гэсэн шийд гаргаж хурлыг бойкотлож байгаа. Үүний үндсэн шалтгаан нь улс төрийн шаардлагын үүднээс тавьж буй асуудал юм. Түүнээс гишүүн хувиараа хуралдаа ирэхгүй байгаа асуудал огт биш. Өнөөдөр МАН-ын бүлэг яагаад завсарлага авав гэхээр Монгол Улсын Ерөнхийлөгчийн зүгээс УИХ-ын тухай хууль, УИХ-ын Дэгийн тухай хуульд өөрчлөлт оруулах  хуулийн төслийг өргөн барьсан. Энэ хоёр хуулийн төслийг ирэх долоо хоногт хэлэлцэнэ. Тус хуулийн төслийг хэлэлцэх явцад УИХ-ын гишүүд бүрэн оролцох  ёстой. Тиймээс МАН-ын бүлэг ирэх даваа гарагт хуралдаж, нэгдсэн нэг шийдэлд хүрэх шаардлагатай учраас УИХ-ын нэгдсэн хуралдаанаас завсарлага авлаа” гэсэн юм. Ингээд дараах асуултад хариулт авснаа хүргэе.

-Ерөнхийлөгчийн өргөн барьсан хуулийн төслийг хэлэлцэхэд бойкот хийж буй 40 гишүүн бүрэн оролцоно гэж ойлгож болох уу?

-Болно. УИХ-ын чуулганд оролцохгүй гэсэн 40 гишүүний тавьж буй шаардлага нь энэ хуулийн үзэл санаатай нийцэж байгаа. Тиймээс хуралд орно.

-МАН-ын бүлгийн гишүүд өчигдөр уулсан юм уу?

-Өчигдөр бүлгийн хурал хийе гэхэд ирц хүрээгүй. Тиймээс бүлгийн хурал хийж чадаагүй. Гэхдээ тодорхой асуудлаар хоорондоо санал солилцсон.

-Таны өрөөнд уулзалт болсон уу. Тал талаасаа гарсан зөвшилцлийн бүлэг юу болсон юм бэ?

-Энэ хуулийн төсөлд зөвшилцөл хүрэх байх гэж бодож байна. Зөвшилцөлд хүрч ингэж шийдсэн гэж хэлэхэд эрт байна.

-УИХ-ын чуулган хуралдалгүй сар гаруй хугацаа өнгөрлөө. Үйл ажиллагаа явуулах чадамжгүй УИХ цаашид байх хэрэгтэй юм уу?

-УИХ тарах тухай асуудал хуультай. Үндсэн хууль, УИХ-ын тухай хуульд тусгаж өгсөн заалттай. УИХ-ын гишүүдийн 3.2 нь буюу 51 гишүүн таръя гэж гарын үсэг зурах юм уу, санал гаргасан тохиолдолд УИХ тарна. УИХ-ын үйл ажиллагаатай холбоотой асуудлаар УИХ-ын 40 гишүүн гарын үсэг зурсан нь улс төрийн шаардлагатай холбоотой. Түүнээс ажлаа тасалсан зүйл биш. Гишүүд өрөөндөө байна, хэсэг бүлгээрээ санал солилцож байна. Бусад нь тойрогтоо ажиллаж байна. Чуулганы шаардлага хангагдах үед хуралдахад бэлэн байгаа шүү дээ.

Р.Хишигжаргал