Ерөнхийлөгч Х.Баттулга УИХ-ын тухай хууль болон УИХ-ын Дэгийн тухай хуульд өөрчлөлт оруулах хуулийн төслийг санаачилж өнөөдөр УИХ-ын дарга М.Энхболдод өргөн барьсан. Үүнтэй холбоотойгоор УИХ-ын Тамгын газрын Ерөнхий нарийн бичгийн дарга Ц.Цолмон сэтгүүлчдэд мэдээлэл өглөө.

Тэрбээр “Хуулийн төсөл боловсруулсан хүн эхлээд Тамгын газарт хандах ёстой. Тамгын газар гурав хоногийн дотор бүрдлийг хянадаг. Хуулийн дагуу шаардлага хангасан гэж үзвэл, УИХ-ын даргад өргөн мэдүүлдэг. Өчигдрийн хувьд зарим зүйл дутуу байсан. Жишээлбэл, хуулийн төслийг заавал файлаар авч parliament.mn сайт дээр нийтэлж, иргэдэд танилцах боломжийг олгодог. Тиймээс дутуу байсан бүрдлийг хангуулсан. УИХ-ын Тамгын газарт олон жил ажилласан, туршлагатай  хуульч мэргэжлийн хүмүүс бий. Эдгээр хүмүүс хуулийн төслийг шаардлага хангасан гэж үзвэл өргөн барьдаг журамтай. Хуулийн төсөл өргөн барьсны дараа Байнгын хорооны дарга УИХ-ын даргын зөвлөлийн хурлаар хэлэлцэх эсэх саналаа ярьдаг. Даргын зөвлөлийн гишүүд хуулийн төслийг хэлэлцэх нь зүйтэй гэж үзвэл тухайн долоо хоногт хэлэлцэх асуудлын дараалалд оруулна. Ингэснээр УИХ-ын чуулганд танилцуулагддаг. Гишүүд санал гаргавал дараалалд нь өөрчлөлт ордог хуультай. Энэ дагуу л явагдана. Нэгэнт хуулийн төсөл өргөн барьчихсан бол хэлэлцэх нь УИХ-ын ажил. УИХ-ын даргын зүгээс энэ хуулийн төслийг яаралтай хүлээж авах нь зөв. Гадаа хүмүүс жагслаа. УИХ-ын чуулган ч хуралдах боломжгүй байна. Нэгэнтээ хуулиар энэ асуудал яригдаад, хэлэлцэгдээд явбал хуулийн дагуу шийдэх нь зөв гэсэн байр суурьтай байгаа” гэлээ.

Р.Хишигжаргал