УИХ-ын гишүүд өөрөө тарах шийдвэр гарах, ээлжит бус чуулган товлон зарлах тухай тогтоолын төслүүдэд гарын үсэг зурж байгаа. Өнөө өглөө УИХ-ын гишүүн Д.Мурат, З.Нарантуяа, Б.Наранхүү, Б.Пүрэвдорж, Я.Санжмятав, С.Эрдэнэ, Д.Эрдэнэбат нарын долоон гишүүн гарын үсгээ зурсан. Тэгвэл УИХ-ын гишүүн Ж.Мөнхбат гишүүн найм дахь гишүүнээр гарын үсэг зурлаа. Тэрбээр энэ талаар “УИХ өөрөө тарах санаачилгыг УИХ-ын гишүүд санаачилга гаргах хуулийн заалттай байдаг. Тиймээс энэ нь хуулийн дагуу явж байгаа процесс гэж хэлж болно. УИХ өөрөө тарах тухай гурав орчим сарын өмнөөс би дугарч байсан. Мөн санаачилж гарын үсэг зурах ажлыг эхлүүлж байсан юм. Төрийн нөхцөл байдал өнөөдөр ямар байгааг бид мэдэж байгаа. Парламентийн үйл ажиллагаа тасалдаад үндсэндээ сар гаруй хугацаа болсон байна. Мөн Засгийн газрын гурван яам эзэнгүй байна. ЖДҮ-ийн асуудалтай холбогдсон хоёр сайд огцрох өргөдлөө өгсөн хүсэлтээ тавьсан. Гэвч чуулган хуралдахгүй, байнгын хорооны ирц хүрэхгүй байна. Зөвхөн энэ асуудал ч биш. Монгол Улсын хүн амын тал шахуу хувь нь амьдран суудаг нийслэл хот удирдлагагүй сууж байна. Энэ олон асуудал би болсон. Тиймээс томилогддог, сонгогддог хаанаас мандат авдаг тэр газартаа очиж хариуцлагаа тооцуулъя гэж ярьсан. Их Хурал ард түмнээс сонгогддог институц учраас ард түмнээрээ дүнгээ тавиулъя. Сүүлийн хоёр сарын хугацаанд та нар муухай, бидний зөв гэсэн хэв маягаар явж байна. Одоо бол цэцэрхэж суух цаг биш ээ. Тиймээс ард түмнээрээ дүгнүүлье гэдэг зарчмын байх суурьтай байна. Энэ бол УИХ-ын М.Энхболдтой холбоотой асуудал биш. Монгол Улсын Үндсэн хуульд төрийн эрх барих дээд байгууллага ньпарламентийн байгууллага гэж заасан. Дэлхийн аль ч улс оронд парламентийн засаглалаа бэхжүүлж явдаг. Гэтэл бид өнөөдрийн үүссэн нөхцөл байдлын улмаас парламентийн засаглалаа эвдэж, энэ нь ганц арга зам гэж харж байгаа нь харамсалтай” гэв.

Р.Хишигжаргал