УИХ-ын гишүүн Б.Ундармаа, Л.Энхболд, Д.Дамба-Очир, Г.Солтан нарын бүрэн эрхийг түтгэлзүүлэх саналыг УЕП-оос гаргасан.Гэвч Халдашгүй байдлын дэд хорооноос гарцаагүй гэм буруутай гэж үзсэн үедээ бүрэн эрхийг нь түтгэлзүүлэх санал оруулсан. Тэр үед нь хэлэлцэе гэдэг тайлбар өгснөөр дээрх дөрвөн гишүүнээ авч үлдсэн юм.
Эндээс үзвэл, Ерөнхий прокурор М.Энх-Амгалан дэд хороонд гаргасан тайлбартай гишүүдийг бүрэн эрхээс нь түтгэлзүүлэх хууль, эрх зүйн үндэслэлээ хангалтгүй дурьдсан гэж ойлгогдохоор. Гэтэл баталгаатай эх суралжаас авсан мэдээлэлээр гишүүний бүрэн эрхээс түтгэлзүүлэх үндэслэл хангалттай бүрдсэн байсан бололтой. Учир юу гэвэл Ерөнхий Прокуророос ирүүлсэн албан бичигт дээрх дөрвөн гишүүн АТГ-д ямар мэдүүлэг өгсөн талаар дэлгэрэнгүй бичсэн байна. Энэ талаар тоймлон хүргэе.
Гишүүний эрхээ барьцаалдаг Д.Дамба-Очир
УИХ-ын гишүүн Д.Дамба-Очир нь АТГ-д нэг удаа гэрчийн мэдүүлэг өгсөн гэдгээ өчигдөр мэдэгдсэн. Ингэхдээ яагаад өөрийнх нь бүрэн эрхийг түтгэлзүүлэх гэж буйг огт ойлгохгүй байна. Би ЖДҮ-гээс зээл олгоход нь дэмжлэг үзүүүл гэж албан бичиг явуулсан нь үнэн. Гэхдээ компанийн нэрийг огт санахгүй байна.
Үүнээс өөрөөр нөлөөлсөн зүйл байхгүй. Их хурлын 30 гаруй гишүүн ЖДҮ-тэй холбогдсон. Намайг онцолсныг ойлгохгүй байна хэмээсэн. Гэтэл үнэн хэрэгтээ Д.Дамба-Очир нь “Сапир стоун” ХХК-д 1.2 тэрбум төгрөг олгохыг хүсэмжлэхдээ ямар нэг барьцаа хөрөнгө байхгүй. Хэрвээ асуудал гарвал гишүүнийхээ үүднээс хандах болно гэдгээ мэдэгдэж байна гэсэн утгатй албан тоотыг явуулсан байх юм. Эндээс үзвэл, Д.Дамба-Очир нь “Сапир Стоун” ХХК-д 1.2 тэрбум төгрөгийн зээлийг барьцаа хөрөнгөгүйгээр гаргаж өгөхөд нь гишүүний суудлаа барьцаалж, хар толгойгоороо хариуцахаа мэдэгдсэн гэж ойлгохоор байна.
ЖДҮ-гийн журмыг өөрчлүүлж зээл гаргуулсан Г.Солтан
Түүний хувьд өөрийн хамаарал бүхий компанид 950 сая төгрөгийн зээл гаргуулахдаа албан үүрэг, бүрэн эрх, албан тушаалын байдлаа урвуулан ашиглаж бусдад давуу байдал бий болгоход нь хамтран оролцсон, ЖДҮХС-гийн албан тушаалтнуудыг зээл олгох журмаа өөрчилж зээл олгоход хүргэсэн болох нь тогтоогдсон байна.
Өрөө төлөхийн тулд ЖДҮ-д нөлөөлсөн Л.Энхболд
Түүний хувьд арай юм аа, гээд хэлчихэд нэг их буруудахгүй байх. Учир нь бусдад өгөх өрөө дарахын тулд иргэн О-гийн компанийг иргэн Ч-гийн нэр дээр бэлэглэлийн гэрээгээр шилжүүлэн авч мах боловсруулах “Дэлгэр говь” төсөл бичүүлж, 2018 оны дөрөвдүгээр сарын 14-ний өдрийн тушаалаар “Хас говь транс” компанид 950 сая төгрөгийн зээл гаргуулсан байна. Ингэхдээ мөн л албан үүрэг, бүрэн эрх, албан тушаалын байдлаа урвуулан ашиглаж, бусдад давуу байдал бий болгоход хамтран оролцсон нь нотлогджээ.
Сонгон шалгаруулалтаас хасагдсан компанид зээл авахад тусалсан Б.Ундармаа
Монголын тэргүүн баяны нэг Б.Ундармаа гишүүний хувьд мөнгө нь дутах биш харин ч илүүдсэн баймаар. Гэвч тийм биш аж. Учир юу гэвэл өмнө нь сонгон шалгаруулалтаас хасагдсан “ Доктор мэйк” компанид 800 сая төгрөгийн зээл олгоход нь мөн л албан үүрэг, бүрэн эрх, албан тушаалын байдлаа урвуулан ашиглаж, бусдад давуу байдал бий болгоход хамтран оролцсон нь нотлогджээ.
Эндээс үзвэл, Улсын Ерөнхий прокурор үндэслэлээ хангалттай танилцуулсан юм байна. Харамсалтай нь, улс төрийн өмнө тэр дундаа улстөрчдийн өмнө хууль хүчний байгууллага хүчин мөхөстөж буй гэдгийги 100 хувь батлан харуулаадахав.
Г.Нацаг-Эрдэнэ
Сэтгэгдэл (12)