УИХ-ын гишүүн О.Баасанхүүгээс тодрууллаа.

-Та чуулганы үеэр нэлээд хатуу үг хэллээ. ЖДҮ-тэй холбоотой асуудлыг хэлэлцэх байсан. 15.00 цагаас хэлэлцэх болов уу?

-Өнөөөдөр 60 тэрбумын хэрэг болон Ерөнхийлөгчийн өргөн барьсан хуулийн төслийг хэлэлцэх ёстой байлаа. Мөн 48 цагийн дотор шийдвэрлэх ёстой ЖДҮ-тэй холбоотой Ерөнхий прокурорын оруулж ирсэн саналыг хэлэцэж, шийдвэрлэх байв. МАН-ын зүгээс энэ асуудлаар нэгдсэн байр сууринд хүрээд ямарч байсан эдгээр хүмүүсээ авч үлдэнэ гэж шийдвэрлэсэн юм шиг байна. Энэ нь Ерөнхий прокурорын саналыг хүлээн зөвшөөрөхгүй, шалгуулахгүй гэсэн үг. Хоёрдугаарт, хуулийн асуудлыг зориуд дахин гацааж байгаа юм байна. Өглөө 10.00 цагт ирсэн. Яахав, шөнийн 5.00 цаг хүртэл байсан юм байна. Хаанаас ч ирж болно гээд 11.00 цаг хүртэл хүлээгээд аргаа бараад лайв хийсэн. Өөрийгөө сурталчлахын тулд хийсэн зүйл биш. Энэ хүмүүс улсаараа ингэж тоглож байгаад харамсч байна. Өчигдөр Хүнс, хөдөө аж ахуй, хөнгөн үйлдвэрийн сайдад Ч. Улааныг томилох асуудлыг хэлэлцэх гэж байхад хойшлуулах санал тавьсан. Учир нь нөгөө хүн нь сайд болно гээд гүрийгээд суугаад байдаг. Гишүүд “Тэгье томилчихъё. Малчид, тариаланчдад шагнал өгөхөд Ч.Улаан гоё харагдана” гэх утгагүй юм яриад нөгөөх нь ч гэсэн юун ширэн нүүртэй юм. Одоо ч гэсэн сайдынхаа асуудлыг нэгдүгээрт яриач гэсэн байдалтай сууж байна. Ж.Мөнхбат гишүүн Ч.Улаанд хандаж хэлсэн юм. “Та бол 65 хүрсэн хүн. Жаргаж суух нас шүү дээ. Тайван бай” гэсэн. Гэтэл гүрийгээд л байна лээ. Манай Их Хуралд гүрийдэг хүмүүс олон байна. Албан тушаалд очих гэж, болих гэж гүрийдэг юм байна. АТГ-т очихгүй гүрийдэг юм байна. Ийм гүрийдэг хүмүүсээс болж чуулган дахиад хойшиллоо. Би МАН-д хандаж хэлээд байгаа. Та нар ажлаа хийвэл хий. Чадахгүй бол боль гээд.

-Та Ерөнхий сайд У.Хүрэлсүхтэй уулзана гэсэн. Ямар асуудлаар уулзах вэ?

-“Энэ асуудлыг яах юм бэ. Та гацааг гаргахад анхаарал хандуулаач” гэж хэлнэ. АН-ын даргатай бас уулзана. Бидэнд маш олон асуудал байна. Энэ асуудлаа шийдээд явъя гэхээр хуралдаа ирдэггүй. Хоёр сар шахам хуралдсангүй. Өнөөдөр нойр нь хүрсэн юм уу, яасан юм. Манай хэдэн нөхдүүд хуралдаа ирсэнгүй.

Б.Лхам