УИХ дахь МАН-ын бүлгийн дарга Д.Тогтохсүрэнгээс тодрууллаа.
-Өнгөрсөн жил УИХ-тай зөвшилцөж Г.Тэнгэр, Н.Чингүүндарь, Б.Хурц нарыг Австрали, Тайланд БНСУ-д суух Элчин сайдаар явуулсан. Гэвч томилгоог нь хийлгүй жил гаран болж байна. Энэ асуудлыг хэлэлцсэн. Ямар шийд гаргасан бэ?
-Элчин сайдуудыг эгүүлэн татах саналыг Гадаад харилцааны сайд Д.Цогтбаатар тавьсан. Үндэслэл нь сайдуудын томилогоог хийгээгүйн улмаас Элчин сайдын үүрэг гүйцэтгэх боломж хязгаарлагдмал байгаа. Саналыг бүлгийн хурлаар хэлэлцээд дэмжсэн.
-Ерөнхийлөгчийн өргөн барьсан УИХ-ын Дэгийн тухай хуульд нэмэлт өөрчлөлт оруулах тухай хуулийн төсөл болон хамт өргөн барьсан УИХ-ын тухай хуульд нэмэлт өөрчлөлт оруулах хуулийн төслийг хэдийд яаж хэлэлцэх талаар ямар шийдэлд хүрсэн бэ?
-Энэ асуудлын хувьд энэ долоо хоногт багтааж батлах нь зүйтэй гэж үзсэн. Өөрөөр хэлбэл, энэ сарын 17-ны өдөр анхны хэлэлцүүлгийг хийж, 18-нд эцсийн хэлэлцүүлгийг хийж батлах нь зүйтэй гэж үзсэн.
-УИХ-ын даргыг чөлөөлөх нь тодорхой боллоо гэх яриа гарлаа. Дараагийн даргад ямар хүмүүс яригдаж байна вэ?
-УИХ-ын даргыг чөлөөлөх асуудал яг тодорхой болоогүй. Эхлээд хууль батлагдана. Дараа нь УИХ-ын даргатай холбоотой асуудлаар нэр бүхий гишүүд тогтоолын төслөө өргөн барина. Өргөн барьсан хуулийг хэлэлцэж батална. Энэ утгаараа дараагийн УИХ-ын даргын асуудал огт яригдаагүй. Бүлэг дотроо хоёр ажлын хэсэг гарч ярилцсан. Энэ үеэр хуулийн төслийг яаж хурдтай явуулах вэ. УИХ-аар хэлэлцэж буй асуудлыг яаж шийдэх вэ. Олон хоног саатсан УИХ-ыг үйл ажиллагааг яаж хурдан явуулах вэ гэдэг асуудлыг л ярилцсан. Түүнээс биш албан тушаалтай холбоотой асуудлыг яриагүй.
Р.Хишигжаргал
