Ирэх сард Цахилгаан тээвэр компани нийтийн тээврийн үйлчилгээнд есөн дуабусыг шинээр гаргах гэж байгаа гэсэн мэдээлэл цацагдсаар байгаа. Тэгвэл энэ талаар Цахилгаан тээвэр компаний ерөнхий инженер О.Баатархүүгээс тодрууллаа.

-Ирэх сард ашиглалтанд орох 9 дуабус яг бэлэн болчихсон байгаа юу?
-Манай компани ерөнхийдөө энэ ондоо багтаад  21 ширхэг дуабус хийх төлөвлөгөөтэй байгаа. Үүнээс  Байгаль Орчны Яамны цэвэр агаарын төслийн газраас  эко чиглэлээр 9 дуабус гаргахаар манай компанид захиалга өгөөд байгаа. Харин ЗТБХБЯ-ны захиалгаар 12 ширхэг дуабус ашиглалтанд  оруулахаар ажиллаж байгаа. Ингээд нийт 21 ширхэг дуабус болж байгаа. Одоогоор яг зургаан дуабус бэлэн болоод ашиглалтанд орсон.

-Хуучин тролейбусуудыг сэргээн завсарлаж ашиглалтанд оруулах боломжтой эсэх мөн акталж байгаа юу?
-Ерөнхийдөө 1987-1995 онд үйлдвэрлэсэн бүх тролейбусыг акталсан байгаа. Акталсан тролейбусуудаа бүгдийг нь устгалд оруулж төмрийн хаягдал болгодог. Харин 2006 оноос хойш угсарсан тролейбусыг засаж сэлбээд, өнгө үзэмжийг нь сайжруулаад нийтийн тээвэрт явуулж байгаа.

-Шинэчлэгдэн гарч байгаа дуабусны хувьд нэг ширхэг нь ямархуу зардлаар босдог вэ?
-Нэг бүр нь 150 мянган ам.доллараар бүтээгддэг. Улсын төсвийн хөрөнгө оруулалтаар хийгддэг. Энэхүү дуабус угсрах ажил маань улсыг хөгжүүлэх бодлогод тусгагдсан ажлуудын хүрээнд явагддаг.

-Шинэ дуабусууд хуучин тролейбусын үнээр явах уу, зорчих тасалбарын үнэ нэмэгдэх үү?
-Тролейбусны зарчмаар явна. Манай компаний хувьд үйлчилгээгээ нэмэх бодолтой байгаагаас үнээ нэмэх бодолгүй байгаа.

-Шинэ гарч буй дуабусууд аль  чиглэлээр үйлчилгээнд явах вэ ?
-Цахилгаан тээврийн компани маань 150 тролейбусны паркын хүчин чадалтай. Анх байгуулагдахдаа 8 чиглэлд тролейбусаар иргэдэд үйлчилж байсан. Одоогоор 3 чиглэлд явж байгаа. Тухайлбал,  III,  IV –р хорооллоос  БММЗ , Үйлдвэр комбинат гэх мэт чиглэлд явж байгаа. Харин цаашлаад  Долоон буудал, Офицер, Сансар гэх мэт чиглэлүүдрүү хүрээгээ тэлэхээр ажиллаж байгаа.

-Бусад нийтийн тээврийн хэрэгслүүдээс давуу тал гэж байгаа юу?
-Шинэ тээвэр юм чинь 2 жилийн баталгаа өгч байгаа. Энэхүү ашиглалтанд орсон болон орох гэж байгаа дуабус нь орчин үеийн техникээр тоноглогдсон, маневр сайтай, хосолсон хөдөлгүүртэй гэдгээрээ бусад тээврийн хэрэгслээс онцлогтой юм. Мөн 30 хүний суудалтай, 100 гаруй хүний багтаамжтай, цагт 50 км хурдтайгаар 15-25 юм зайд контактын шугам сүлжээгүй явах боломжтой. Хамгийн гол нь цахилгаанаар явахаас гадна цахилгаанаа хуримтлуулдаг, шаардлагатай тохиолдолд бинзенээр  явах боломжтой байгаа.