УИХ-ын өнөөдрийн нэгдсэн чуулганаар Монгол Улсын Ерөнхийлөгчийн өргөн барьсан УИХ-ын тухай хууль, УИХ-ын Дэгийн тухай хуульд нэмэлт өөрчлөлт оруулах хуулийн төслийг хэлэлцэж дэмжлээ.

Хурлын үеэр УИХ-ын гишүүн Ж.Мөнхбат “Өнөөдөр бид парламентын дархлаа руугаа гар дүрж байгаа. Монгол төрийн босго намсаж байна. Үндсэн хуулиа өөрчлөхгүй бол Монгол Улс парламентын засаглалтай хэвээр байна. Би дархлааг нь хэт сулбайлгах биш амин чанарыг нь хадгалж үлдэхийг бодож энэ саналыг гаргасан” гэлээ.

Харин Л.Оюун-Эрдэнэ гишүүн “УИХ-ын дарга нь Засгийн газрыг огцруулах саналд өөрөө гарын үсэг зурдаг байж болохгүй. Парламентын дархлаатай холбоотой асуудал үүсч магадгүй. Тэгвэл УИХ-ын даргыг өөрөө өргөдлөө өгч огцрох эрх нь байгаа” гэв.

УИХ-ын гишүүн Ж.Бат-Эрдэнэ “УИХ шударга бусын жинхэнэ хонгил болж байна шүү. Шившиг болж байна шүү. Гишүүд энд анхаараарай. Яахав, хууль маргааш батлагдаад УИХ-ын дарга ажлаа өгөх байх. Үүний цаана та бүхэн МАНАН, шударга бус, мафижсан бүлэглэл хаана байна, хэзээ гарч ирснийг бодоорой. Гэхдээ О.Баасанхүүгийн хэлдэг шиг хууль үндэслэлтэй байх ёстой.

Ийм ийм үндэслэлээр нийт гишүүдийн 2/3 нь дэмжсэн бол орох ёстой. Энэ бол цаанаа 32, 33 асуудал шүү. Энэ намын 65 асуудал. Эрх мэдэл булаацалдсан асуудал шүү. МАН-ын асуудал. Үүний цаана шударга загнаад байгаа зүйл байхгүй. Шударга зүйлийг хуулийн нөхцөл биелүүлнэ. Хэдхэн хоногийн өмнө ЖДҮ-тэй холбоотой асуудлаар бид ард түмний өмнө шившигээ тарьсан” хэмээн ярив.

УИХ-ын дарга М.Энхболд “Энэ бол улс орны эдийн засаг, нийгэмтэй холбоотой асуудал. Монгол Улс дэлхийн зах зээлд яаж харагдах гэдэг харагдана шүү. Бүх асуудал хуулийн дагуу явах хэрэгтэй. Ер нь намайг миний гэр бүлийн хүнтэй минь хамт буудахаар төлөвлөж байгаа юм байна л даа. Гэр бүлийн минь хүн миний улс төрийн ажилд огт оролцож байгаагүй. Архины зөвшөөрлийг миний эхнэр биш өөр хүний авгай олгодог байсан. Андуураад байгаа бололтой. Намайг дагаж, хотын захиргаанд  шинэ жилээр л ганц ордог байсан хүн. Ж.Батзандангийн тухай үг хэлье. Ж.Батзандан хамгийн том дуугарч, шүдэнз зурдаг. Тэгсэн хэрнээ мөртлөө асуудал үүсэхээр гараад зугтчихдаг, ийм л хүн. Манай намын байшинг шатаалцаж явсан хүн. Аягүй бол 2020 онд манай намаас дэвшинэ гээд явж байж ч мэдэх хүн. Үүнийг залуу гишүүд хэнтэй нөхөрлөж байгаа вэ гэдгээ бодох хэрэгтэй” хэмээв.

Р.Хишигжаргал