ЖДҮХС-гийн зээл олголттой холбоотой асуудлыг шалган судлах чиг үүрэг бүхий “Түр хороо байгуулах тухай” тогтоолыг УИХ-ын чуулганы нэгдсэн хуралдаанаар хэлэлцэж санал хураалаа. Санал хураалтад 56 гишүүн оролцсноос 36 гишүүн нь Түр хороо байгуулах шаардлагагүй гэж үзсэн юм. ЖДҮ-г шалгах түр хороо байгуулах тогтоолын төслийг Н.Номтойбаяр, Н.Амарзаяа, Ж.Бат-Эрдэнэ, Д.Ганболд, Д.Оюунхорол, О.Содбилэг, А.Ундраа нарын гишүүн санаачлан өнгөрсөн оны арваннэгдүгээр сарын 21-нд УИХ-ын даргад өргөн мэдүүлсэн юм.

Жижиг, дунд үйлдвэр эрхлэгчдийг дэмжих зорилгоор хөнгөлөлттэй нөхцлөөр олгодог ЖДҮХС-гийн зээлээс УИХ, Засгийн газрын гишүүд, төрийн өндөр албан тушаалтнуудын хамаарал бүхий компаниуд их хэмжээний зээл авсан нь нийтэд ил болсон. Тиймээс уг асуудлыг нарийвчлан шалгаж, хуул зөрчсөн этгээдүүдэд хариуцлага тооцох, нийтэд үнэн бодит мэдээлэл хүргэх зорилгоор Түр хороо байгуулах тогтоолын төсөл боловсруулснаа Н.Номтойбаяр гишүүн танилцуулаад байсан.

Тэгвэл гишүүдийн олонхийн саналаар ийнхүү Түр хороо байгуулах боломжгүй болсон юм. Чуулганы үеэр Н.Номтойбаяр “Нийгмийн захиалгын дагуу Түр хороо байгуулах гэтэл 56 гишүүнээс 36 нь эсэргүүцлээ. ЖДҮ-чид үнэхээр дийлэдэхгүй юм байна. Харамсалтай байна. Цөөнхийн бүлгээ дэд даргаар ахлуулъя. Намайг эсвэл түр хорооноос хасчих. Шалгах нь буруу гэж үзэж байгаа бол. Их хурал ажлаа хийх хэрэгтэй. З.Нарантуяа гишүүнээ тогтоолын төслийг дахиж оруул ир. Намайг гэхдээ хасчихаарай. АН бүлгээрээ хуралд” гэв. Үүний дараа З.Нарантуяа гишүүн “ЖДҮХС-гийн хөрөнгийг зориулалтын бусаар ашигласан нь эрүүгийн хэрэг. Эрүүгийн хуульд заасан байгаа. Би аль нэг бүлэглэлийг дэмжих гэсэнгүй. Ийм илт зохион байгуулалттай зүйлийг гэмт хэрэг гэж үзэхгүй юм бол юуг гэмт хэрэг гэх бэ.

Ийм зүйлийг хайцаалдаг Засгийн газар байх ёстой юм уу. УИХ хяналтаа тавьж чаддаг байх хэрэгтэй. Түр хороо байгуулбал байнгын хороотой адил эрхтэй байдаг юм байна. ЖДҮ-г шалгах боломжтой болох юм байна. Түр хороо байгуулах тогтоолын төслийг дахиж оруулна” гэсэн юм.

Харин Түр хороо байгуулахын эсрэг кноп дарсан Л.Болд гишүүн “Биднийг ЖДҮ-г дэмжлээ гэж албаар харагдууллаа. Гэтэл 20 гаруй гишүүд эрүүгийн хариуцлага хүлээх болчихсон байгаа. Хэрвээ Түр хороо байгуулбал энэ хэрэг замхарна. Хуулийн байгууллага ажиллах боломжгүй болно.

ЖДҮ-г шалгах эрүүгийн арга хэмжээг зогсоох гэж байсныг чинь бид болиулж байна. Түүнээс биш ЖДҮ-чдийг дэмжсэнгүй. Ийм түр хороо байгуулна гэдэг чинь хуулийн байгууллага ажиллах боломжгүй болно. Та нар ингэж болохгүй” гэхэд УИХ-ын дарга М.Энхболд “Л.Болд гишүүн ээ, ам, хуруу хоёроо нэг байлга л даа. Өгсөн санал чинь тодорхой байна шүү дээ” гэснээр ЖДҮ-г шалгах Түр хороо байгуулахаас татгалзсан тогтоолын төслийг баталлаа.

Г.Нацаг