УИХ-ын гишүүн З.Нарантуяа Шилүүстэй суманд ажиллах үеэрээ өнгөрөгч 2018 онд тус сумд хэрэгжүүлсэн ажлаа тайлагналаа. Тэрбээр “Манай аймаг 2018 оныг бүтээн байгуулалтын жил болгохоор төлөвлөсөн. 2018 онд нийт 21.6 тэрбум төгрөгийн төсөвт өртөг бүхий 17 төсөл хөтөлбөрийг хэрэгжүүлэхээр сум тус бүрд хуваарилсан. 2017, 2018 онд өөрийн сонгогдсон тойргийнхоо сумдын асуудлыг шийдвэрлэх талд хөрөнгө оруулалтыг түлхүү тавьсан. Учир нь өмнө нь төсвийн хөрөнгө оруулалтаас бага хүртсэн, анхаарлын гадна үлдсэн байсан. Тиймээс сум бүрд сургууль, цэцэрлэг, усан хангамж, цахилгаан сүлжээ, холбоог шийдэхээр зорьсон. Одоогоор цаг хугацаандаа, амжилттай бүтлээ. Зарим төслийн тендер оройтож зарлагдсан ч хийгдэж дуусч байна. Тухайлбал, Отгон сумд гэхэд 550 сая төгрөг бүхий өндөр хурдны интернетийг нэвтрүүлэх ажил хийгдэж дууслаа. Мөн өндөр хурдны 4G сүлжээ орсон. Мөн хоёр багийн дунд үүрэн телефон утасны сүлжээ орж өнөөдөр нээлтээ хийлээ. XXI зуунд холбоо харилцаагүй, интернетэд холбогдох боломжгүй зургаан жил төсөв нь шийдэгдэхгүй явсны эцэст өнгөрсөн жил төсөвт суулгаж энэ жил тус ажил бүрэн гүйцэтгэгдлээ. Эмнэлэг, сургуулийн, цэцэрлэгийн засвар хийгдэж байна” гэв.
З.Нарантуяа гишүүн Шилүүстэй суманд хийж хэрэгжүүлж буй ажлынхаа талаар “Шилүүстэй сумын удирдлагуудтай нь нягт хамтарч ажилладаг. Иргэдийн дунд тулгамдаж буй шийдвэрлэж өгөхийг хүссэн асуудлыг чадах чинээгээрээ шийдвэрлэж байгаа. Улсын төсвийн хөрөнгөөр 100 хүүхдийн цэцэрлэгийн ажлыг “Жавхлан Туэр” компани гүйцэтгүүлж байна. Энэ жилийн санхүүжилт болох 300 сая төгрөгийг төсөвлөснөөр барилгын ажил 30 хувьтай явж байна. Тус компанийн удирдлагаас “Хавар газар гэсэхээр барилгын ажлаа үргэлжлүүлнэ” гэж байна. Миний зүгээс есдүгээр сарын 1-нд цэцэрлэгээ ашиглалтад оруулаарай, энэ хавар санхүүжилтийг нэмэгдүүлж өгнө” гэдгийг хэлсэн. Харин компанийн зүгээс мөн амлалт өглөө. Есдүгээр сарын 1-нээс цэцэрлэг бүрэн ашиглалтад орно гэж итгэж байна. Үүнээс гадна Ерөнхий боловсролын сургуульд 10 сая төгрөгийн санхүүжилт шийдэж өгсөн. Мөн соёлын төв болон Засаг даргын тамгын газрын байрыг шинээр шийдэж өгөх саналыг Шилүүстэй сумын зүгээс надад тавьсан. Энэ жил дөрвөн сумын Засаг даргын Тамгын газрыг шинэчлэх ажлын хөрөнгийг төсөвт оруулах гэсэн боловч нэг тойрогт хуваарилагдсан төсвийн хэмжээ хязгаартай учир Шилүүстэй сумыг оруулж чадсангүй. Харин Эрдэнэхайрхан сумийн Засаг даргын тамгын газрыг шинэчлэх төсөв орууллаа. Эрдэнэхайрхан сумын Засаг даргын тамгын газрын барилга хэдэн жилийн өмнө актад орсон. Яаралтай шинэчлэх зайлшгүй шарлагатай байгаа. Сумын Засаг даргын Тамгын газрын барилгыг шинэчлэх төсвийг 2020 оны төсөвт оруулна. Энэ сумын бас нэг тулгамдсан асуудал нь орон нутгийн дотуур байрны асуудал. Үүнийг шийдвэрлэхээр 200 сая төгрөгийн төсөв суулгасан. Одоогоор дотуур байрны ажил сайн явагдаж байна.
Өнөөдөр сумын Засаг дарга, ИТХ-ын дарга нар сумын байгууллагуудыг нэгдсэн халаалттай болгох асуудлыг тавьж байна. Энэ санаачилгыг дэмжиж байна. Нэгдсэн халаалтын ажлыг цаг алдахгүйн тулд барилгын ажил гүйцэтгэж буй компаниудтай хамтарч хувийн сектороор хийлгэж байгаад дараа нь концессийн журмаар хөрөнгийг нь үе шаттайгаар шийдвэрлүүлэх боломжийг бид ярьсан. Нэгдсэн халаалтын асуудал энэ жил шийдэгдэхгүй. Жил дараалж шийдэгдэхээр байна. Эдгээрээс гадна өмнөх жил нутгийн иргэдээс хөрзөн ховхлох ковштой болгож өгөхийг хүссэн. Энэ асуудлыг төсвөөс шийдэх боломжгүй учир хувийн зүгээс “Жавхлант Туэр” компани захирал н.Жаминсүрэн долдугаар сард авчирч өгөхөөр болсон” хэмээн ярив.
Шилүүстэй сум нь 1924 онд байгуулагдсан 95 жилийн түүхтэй. Завхан аймгийн уугуул сумдын нэг юм. Тус сум 1791 хүн амтай, 134 мянган малтай бөгөөд нийт 498 өрхтэйгөөс 289 нь малчин өрх юм байна. Тус сумын Засаг дарга Д.Алтанжаргал сумд тулгамдаж буй асуудлын талаар “Сүүлийн жилүүдэд хүн амын тоо цөөрч байна. Шалтгаан нь оюунтан болсон залуучууд нутагтаа эргэж ирэхгүй байна. Их сургууль төгсөж ирсэн залуучуудад ажлын байр хомс, ахмадууд тэтгэвэрт гарах үед л ажлын байр бий болж байна. Сумд үйлдвэрлэл үйлчилгээ явуулах боломж бага байна. Учир нь манай сум дэд бүтэц муу хөгжсөнөөс үйлдвэрлэл эрхлээд гарсан бүтээгдэхүүнийг борлуулах боломж хомс. Мал аж ахуйг түшиглэсэн бодлого баримталж байж ажилгүйдэл буурахаар байна” гэв.
Б.Хишигжаргал
