Намрын чуулган нээснээс хойшхи энэ хугацаанд ширэн нүүрэлсэн Их хурлын гишүүдэд шийдэж, шийдвэрлэх ёстой ажил гэхээс илүүтэй эрх мэдэл, албан тушаалын төлөөх зодоон чухал байсаар ирэв.

     Өнөөгийн улс төрийн гол дүрээр тодроод буй Л.Оюун-Эрдэнэ, Б.Батзандан, Т.Аюурсайхан, Х.Нямбаатар нарын гишүүд улс төрийн гацаа гэгчийг зохиомлоор үүсгэхдээ УИХ-ын дарга М.Энхболдыг гол буруутнаар цололсон. Тиймдээ ч Ерөнхийлөгчөөс дэмжлэг аван байж, хууль санаачлуулж, бүр болоогүй үүнийгээ батлуулчихлаа. Ингэснээр дээрх гишүүдийн зоо тэнийх өдөр улам ойртож, дараагийн Их хурлын дарга хэн бэ гэдэг асуулт улам олширч байна.

         Хэдийгээр Л.Оюун-Эрдэнэ гишүүн “Жагсагчид албан тушаал горьдож болохгүй” гэж хэлсэн ч гэлээ энэ нь өөрсдөө уснаас хуурай гарах гэсэн санаа гэдэг нь ойлгомжтой. Гэхдээ түүний эл үгний цаад санаа хэнийг онилж, хэнийг чиглэсэн бэ гэдэг таавар тайлагдаагүй л байна. Юутай ч  шударга бусын хонгил хэмээн лоозондож, өөрсдийгөө өрөвдүүлэх, аваруулах тактикаа болгосон нэр бүхий зарим гишүүд Их хурлын даргын сэнтийн төлөөх марафонд оролцож буй сурагтай.

           Тиймдээ ч дээрх нэр гишүүдтэй хавсаадаж, Их хурлын даргыг огцруулахад гарын үсгээ гамгүй хайрласан бололтой юм. Энэ туйлшралын гол зорилго нь шударга үнэний төлөө гэж лоббидож байгаа ч эрх мэдлийн төлөөх тэмцэл гэдэг нь ойлгомжтой. Попорчин гишүүдийн хэлснээр дараагийн УИХ-ын даргыг ардчилсан, нээлттэй, зөв зарчмаар тодруулна. Ингэхдээ хувьсгалт өөрчлөлт хийх чадвартай, түүх намтартай хүнийг дэмжинэ гэдгээ илэрхийлсэн.

             Гэвч төрийн мөнгөнд гар дүрээгүй, ашиг сонирхлын зөрчилгүй гишүүн өнөөгийн парламентад цөөхөн гэдэг нь улстөрчдийн зодооноос бэлэхнээ харагдсан. Ард түмний шударга хүү гэгддэг Ж.Энхбаяр гишүүн хүртэл ЖДҮ-чин шүү дээ.

Үүнийг харсан иргэд “ЖДҮ -чин ЖДҮ-нээ хамгаалалгүй яахав” гэж дуу алдсан. Тиймээс ийм цаг үед попорчдын хэлсэн шиг хувьсгалт өөрчлөлтийг эхлүүлэх дараагийн УИХ-ын дарга энэ парламентаас төрөх боломж бий болов уу.  

Б.Лхам