УИХ-ын дэд дарга Л.Энх-Амгалангаас цаг үеийн асуудлаар тодрууллаа.

-УИХ-ын чуулганыг сунгах саналтай цөөнгүй гишүүд байна. УИХ-ын Дэгийн тухай хуулинд юу гэж заасан байдаг юм бэ?

-Ерөнхийлөгч УИХ-ыг чуулганыг сунгах тухай санал ирүүлсэн. Гэхдээ сунгах, ээлжит бус чуулган зарлах эрх зөвхөн УИХ-ын даргад хадгалагдаж байдаг. Гэхдээ өнгөрсөн хугацаанд УИХ-ын дэргэдэх зөвлөл хуралдаад чуулганыг сунгах эсэх асуудлыг шийдвэрлэж ирсэн. УИХ-ын чуулган нийт долоон удаа хойшилсон. Үндсэн хуульд тухайн чуулган 50-иас доошгүй удаа хуралдсан байх заалттай. Үүнд нэгдсэн хуралдаан, байнгын хорооны ажлын хуралдааныг оруулж ойлгоно. Хэдийгээр чуулган долоон удаа хойшилсон ч байнгын хороо, нэгдсэн ажлын хэсэг хуралдаж байсан. УИХ-ын үйл ажиллагаа тасралтгүй үргэлжилж байсан. Ер нь УИХ-ын Дэгийн тухай хуулинд өөрчлөлт оруулах цаг нь болжээ. Сайн дураараа чуулганы хуралдааныг тасалдаг, байнгын хорооныхоо хуралдаанд оролцдоггүй асуудал байгаа учраас хариуцлага алдаж байна. Ард иргэдийнхээ өмнө тангарагтай хүмүүсийн сахилга хариуцлагыг сайжруулах шаардлага байна. Мөн Дэгийн тухайн хууль зөрчигдсөн хэд хэдэн хэрэг гарлаа. Тодруулбал, Хүнс, хөдөө аж ахуй, хөнгөн үйлдвэрлэлийн сайдыг 30 хоногоос нь хэтрүүлж томиллоо. Засгийн газрын хоёр гишүүний асуудлыг өргөн барьсны дараа долоо хоногийн дотор харьяалсан байнгын хороо хэлэлцэх ёстой. Нийгмийн бодлого, боловсрол, соёл шинжлэх ухааны байнгын хороо Ц.Цогзолмаа сайдын асуудлыг дэмжиж хуралдсан. Харин Зам тээврийн хөгжлийн сайд Я.Содбаатарын асуудлыг Эдийн засгийн байнгын хороо одоог хүртэл авч хэлэлцэхгүй байна.

-Намрын чуулганы хуралдаан тоондоо хүрсэн үү?

-Бүлэг, байнгын хорооны хуралдаан тоонд орох учраас тоондоо хүрнэ.

-Та чуулганы хугацааг сунгах шаардлагатай гэж үзэж байна уу?

-Шаардлагатай. Намрын чуулганаар хэлэлцэх гол асуудлын нэг нь Үндсэн хуулийн өөрчлөлтийн асуудлыг төлөвлөсөн байсан. Улс төрийн намын тухай хууль, Сонгуулийн тухай хуулийг хэлэлцэх байсан ч чадсангүй. Мэдээж Төсвийн тухай хууль цаг хугацаатай учраас тухайн хугацаанд нь хэлэлцэж, баталсан. Чуулганыг наад зах нь 14 хоног сунгаж хуралдуулбал Үндсэн хуульд нэмэлт, өөрчлөлт оруулах асуудал амждаггүй юм гэхэд Сонгуулийн тухай хуулийнхаа асуудлыг хэлэлцэх шаардлага байна.

-Хөгжлийн банкнаас таны хамаарал бүхий компанийн нэр дээр 170 тэрбум төгрөгийн зээл авсан гэх мэдээлэл байна. Үүнд тайлбар өгнө үү?

-Би Хөгжлийн банкнаас нэг ч төгрөгийн зээл аваагүй. Надад "Говийн зам" ХХК-ийн нэг ширхэг хувьцаа ч байхгүй. Энэ компани бол "Эрдэнэс Монгол" компанийн охин компани. Намайг 2015 оноос Хөгжлийн банкийг ахалж, шалгаснаас хойш л ийм гүтгэлэг гарсан. Би хоёр удаа УИХ-ын халдашгүй бүрэн эрхээсээ татгалзаж, шалгуулах бичгийг УИХ-ын Халдашгүй байдлын дэд хороо АТГ-т хүргүүлж байсан.

-УИХ өөрөө тарах талаар та ямар байр суурьтай байгаа вэ?

-УИХ хуралдаж чадахгүй, Үндсэн хуулийнхаа өөрчлөлтийг хийж чадахгүй ийм хэмжээнд хүрвэл гарын үсэг зурна. Гэхдээ энэ сонголт маш өндөр босготой. УИХ-ын 57 гишүүн гарын үсэг зурж байж  УИХ тарах ёстой.

Б.Лхам