УИХ-ын намрын чуулганыг сунгах асуудлаар Ерөнхийлөгч УИХ-ын албан шаардлага хүргүүлсэн тухай яригдаж байна. Мөн УИХ-ын зарим гишүүд намрын чуулганыг сунгах саналтай байгаагаа илэрхийлж буй. Намрын чуулганы хугацааг дахин сунгах шаардлага байгаа эсэх талаар УИХ-ын гишүүн, АН-ын дарга С.Эрдэнээс тодруулахад “Намрын чуулган ерөнхийдөө хуралдсангүй. Энэ хугацаанд эх оронч, шударга ёсны төлөө гэх хаяг зүүсэн хүмүүс Монгол төрийг гацааснаас үүдэн намрын чуулган явсангүй. Эрх барьж буй МАН дотоод зөрчил тэмцлээ болиоч ээ, Монгол төрийг битгий гацаагаач гэдэг шаардлагыг удаа дараа тавьсан. Төрийн ажлыг гацаах замаар намын дотоод хэрүүл, зодооныг бид хүлээн зөвшөөрч болохгүй. УИХ-ын дэгийн тухай хуульд нэмэлт, өөрчлөлт оруулсан шүү дээ. Үүнд УИХ-ын гишүүн хүндэтгэн үзэх шалтгаангүйгээр чуулганы 1/3-т суугаагүй бол эгүүлэн татах нөхцөл бүрдэнэ гээд заасан.

Гэтэл нэр бүхий гишүүд шалтгаангүйгээр намрын чуулганыг бараг бүтэн тасаллаа. Үүргээ гүйцэтгэсэн гишүүд нь хохирч, улс төр хөөж, популизм хийж явсан хэд нь хожиж байна. Чуулганы хуралдах хугацааг хойшлуулах тухай нэг биш гишүүдийн ярихыг сонссон. Харин Ерөнхийлөгчийг албан бичиг хүргүүлсэн тухайн сая сонсож байна. Миний хувьд УИХ-ын чуулган дэгийн хүрээнд, хугацаандаа л хуралдах ёстой. Түүнээс биш хэн нэгэн хүссэн тасалж, сунгаж байж болохгүй. Бүх зүйл хуультай шүү дээ. Үндсэн хуулиндаа хүртэл зааж өгчихсөн. Төрийн бүх шатны албан тушаалтанг зөвхөн хуулийн хүрээнд ажил үүргээ явуулах ёстой гээд. Энэ зарчмыг л барьж ажиллах ёстой. Улс төрийн зорилго сонирхлоор явдаг ажил биш” гэсэн тайлбарыг өглөө.

Б.Лхам