УИХ-ын гишүүн Ж.Батзандан, Л.Болд, Х.Нямбаатар, Л.Оюун-Эрдэнэ, Т.Аюурсайхан нар “Баялагтаа эзэн Монгол” бүлэг байгуулж байгаа талаараа мэдээллээ. Уг бүлэгт УИХ-ын гишүүн Д.Мурат, Б.Энх-Амгалан нар нэгдэхээ албан ёсоор илэрхийлсэн бол УИХ-ын С.Жавхланд урилга илгээсэн байна. Энэ талаар УИХ-ын гишүүн Л.Болд “Бид маргааш тэмцлээ ялалтад хүргэнэ. Бидний тэмцэл ганц хүнийг албан тушаалаасаа огцруулах биш. Хэрвээ маргааш ямар нэгэн шалтаг шалтгаан гаргаад УИХ-ын даргыг огцруулах асуудалд саад учруулвал бид ч улс төрийн хурцын хурт тэмцлийн хэлбэрт шилжинэ. Гэхдээ ийм байдалд оруулахгүй байх. Өлсгөлөн зарласан 11 иргэн өргөх бичгээ бичиж өгсөн. Үүнийг нь УИХ-ын даргад гардуулна. Өлсгөлөн зарласан иргэд дунд өндөр настан бий. Тэдний бие эхнээсээ тогтворгүйжсэн. Бид өлсгөлөнгөө зогсоохыг санал болгосон ч эрхээ эдэлнэ гэдгээ хэлсэн” гэсэн юм.

УИХ-ын гишүүн Т.Аюурсайхан “Баялагтаа эзэн болохын тулд хамгийн түрүүнд УИХ-ын дарга М.Энхболдыг огцруулж, дараа нь хууль шүүхийн байгууллагад шударга ёс тогтоохын төлөө ажиллана. Монгол Улсын болон гаднын хөрөнгө оруулагчдын хүртэх ёстой ашгийн тайланг гаргаж өгөхгүй байна. Эсрэгээр нь ажлын хэсгийг дайлж чадаж байна. Ингэж бусдын аманд ормооргүй байна. Тэр дундаа Цагаан суварга, Салхитын мөнгөний орд, Асгатын мөнгөний ордоос эхлээд монголчууд баялагтаа эзэн нь болох цаг ирсэн. Тэр цагт нийгэм эдийн засгийн хүндрэлийг даван туулна. Энэ бүх ажил амархан бүтэхгүй. Үүний тулд хууль шүүхийн байгууллагад цэвэрлэгээ хийнэ. Улстөрчдын гар хөл болсон хүмүүсийг цэвэрлэнэ. Эх орноо гэсэн, мэргэжилдээ үнэнч, тангарагтаа үнэнч хүмүүс хууль хяналтын байгууллагад бий. Гэхдээ маш их улстөрждөг болсон. Дээрээсээ доош хүртэл бүхэлдээ барьцаанд орсон. Нэгнийгээ барьцаалж байна. Өнгөрсөн долоо хоногт ил болсон Эрдэнэтийн 49 хувь бол зөвхөн ганцхан асуудал. Үүний цаана олон асуудал бий. Шүүгч нар буруу шийдвэр гаргасан гэж үзсэн иргэд бидэнд материал өгч байна” гэлээ.

УИХ-ын гишүүн Л.Оюун-Эрдэнэ “Эрдэнэтийн 49 хувийг Сингапурт худалдсан явдал үнэн болж таарсан. Хувьцаа худалдах болон эрх шилжүүлэх гэрээ хийгдснийг цагдаагийн байгууллагад шалгуулахаар өгсөн. 400 орчим сая ам.доллароор худалдаалсан гэх “Эрдэнэт”-ийн 49 хувийг 40 сая ам.доллар болгоод Номуундарь гэх бүсгүйд Сингапурын бүртгэлтэй компанид шилжүүлсэн. Ингэхээр Эрдэнэтийн 49 хувь Монгол Улсын хуулиас гараад явчихаж байгаа юм. Өөрөөр хэлбэл, Их хурлын тогтоол хэрэгжих боломжгүй болно. Ямар нэгэн асуудал үүсвэл Арбитрын шүүх дээр очно. Арбитрын шүүх дээр ялагдах магадлалтай байгаа, ийм чиглэл Ч.Сайханбилэг Ерөнхий сайд асан өгсөн талаар Зориг гэдэг залуу мэдээлэл өгсөн. Хэрвээ “Эрдэнэт”-ийн 49 хувь Монголоос гараад явчихвал яг Оюутолгой шиг нөхцөл байдалд орно. Өөрөө хэлбэл, Монгол Улсын бүх шатны шүүхийн шийдвэр хүчин төгөлдөр биш болно. Дараа нь 40-хөн сая төгрөгөөр худалдаж болно гэсэн үг. Эрдэнэтийн 49 хувьд 1995 онд төрсөн Батхан овогтой Номуундарьд Пүрэвтүвшин гэдэг залуугаас шилжсэн байна. “Эрдэнэт”-ийн 49 хувь яахаараа хоёр залуугийн гарт ороод яваад байдаг юм бэ. Энэ бүлэглэл яг ийм зүйл хийдэг. Энэ асуудал хууль зүйн салбар дээр очихоор “бид мэдэхгүй ээ, бид хамаарал бүхий этгээд биш” гэнэ. Өмнө нь ч ийм зүйл болж байсан. Магадгүй эцэсийн дүндээ энэ хоёр залууг эцсийн мөчид золиосолно. 

Дээр нь ахиад нэг зүйл бий. Төв талбайн газраа нэг компанид алддаг төр гэж дэлхийд байхгүй. Зөвхөн монголчууд л байна. Сүхбаатарын талбайн өмнөх цэцэрлэгт хүрээлэнд барилга байгууламж барихаар зураг төсөв нь гарсан байна лээ. Өөрөөр хэлбэл, гэр барьсан газраас өмнөх талбай нь бусдын эзэмшилд очсон гэсэн үг.  Зарим мэдээллийг АТГ-д өгч шалгуулна. Бадамжунайтай, Эрдэнэбат, Алтай констракшны Бат-Эрдэнэтэй холбоотой асуудал бий. Нийслэлийн засаг захиргааг Яармаг руу нүүлгэхээр болсон. Гэтэл барилга баригдах газрыг тойруулаад Бадамжунай бүх газрыг авчихсан байна. Тэнд одоо газар ямар үнэтэй билээ. Нийслэлийн Засаг захиргаа нүүж очихоор хэд болж өсөх бэ. Энэ бол газрын наймаа шүү. Наранхүүтэй холбоотой асуудал яг имйм процессоор явагдсан” гэлээ.

Г.Нацаг