УИХ-ын гишүүн Ж.Батзандан, Л.Болд, Х.Нямбаатар, Л.Оюун-Эрдэнэ, Т.Аюурсайхан нар “Баялагтаа эзэн Монгол” бүлэг байгуулж байгаа талаараа мэдээллэсэн. Энэ үеэр сэтгүүлчдийн асуултад хариулсныг тоймлон хүргэе.

-Эрдэнэтийн 49 Засгийн газрын өмч. Гэтэл яагаад Засгийн газар мэдээлэл хийхгүй байгаа юм бол. Дээр нь ТУЗ-ын дарга нь ямар ч мэдээлэлгүй байна гэдэг зүйлийг өнгөрсөн долоо хоногт өгсөн. Уг нь шүүх дээр маргаантай байгаа асуудал юм билээ шүү дээ?

-Л.Оюун-Эрдэнэ: 49, 51 хувийн аль аль нь ТУЗ нь хуралдаж байж, эцсийн шийдийг гаргах ёстой. Дээр нь шүүхэд маргаантай байгаа хэрэг учраас Засгийн газарт заавал мэдэгдэх ёстой. Гэтэл тоглоомын энэ дүрмийг баримтлалгүйгээр ийм зүйл хийж чадаж байна. Уг нь УИХ-аас стратегийн ордыг авахдаа батлах ёстой. Ч.Сайханбилэг үүнийг юу гэж тайлбарласан бэ гэхээр Засгийн газрыг хуралдуулахгүйгээр Ерөнхий сайдын хувиар ганцаараа шийднэ гээд шийдсэн. Одоо энэ асуудал нь зөв, буруу байсан гэдэг зүйл яригдаж байна. Яг үүнтэй адил зүйл болж байна. Эрдэнэтийн үйлдвэрээс ийм зүйл болоогүй гэж нууж байгаад шилжүүлсэн бол бид юу хийж чадах уу. Эрх шилжүүллээ гэхэд маргаан үүснэ. Арбитрын шүүхэд хандлаа гэхэд бид ялах нь ойлгомжтой. Бид хуульгүй нийгэмд амьдарч байна гэж хэлээд байгаа нь энэ.

-Талбай дээр 11 иргэн өлсгөлөн зарласан. Хэдхэн хоногийн дараа сар шинийн баяр боллоо. Уг нь та хэд өөрсдөө жагсч болоогүй юм уу. Аль 14 хоногийн өмнө та тав хурц хэлбэрт шилжинэ гэж мэдэгдсэн шүү дээ?

-Ж.Батзандан: Тэдгээр иргэдийн хувьд өөрсдийн сайн дурын үндсэн дээр гэрээслэлээ бичиж өлсгөлөн зарласан. Бидний зүгээс ирэх мягмар гариг хүртэл өлсгөлөн зарлахгүй байхыг санал болгосон. Харамсалтай нь, иргэд тэвчиж суухаас залхаж байна гээд өлсгөлөнгөө эхлүүлсэн. Хэрвээ маргааш бидний хүссэн үр дүн гарахгүй бол бид таван гишүүн өлсгөлөн зарлана.

-Хоёр иргэний биеийн байдал тааруухан байгаа гэсэн. Эмчийн үзлэгт хамруулсан уу?

-Эмнэлгийн пост 24 цагаар ажиллаж байна. 60-аас дээш насны хоёр иргэн бий. Эмчийн үзлэгт хамруулсан. Хоёр иргэний биеийн байдал тогтворгүй байгаа. Өнөөдөр өглөө иргэн Баатарсүрэн, Янжмаа гуайн биеийн байдал муудах үед эмнэлэгт үзүүлсэн. Болиоч ээ гэхэд гэрээслэлээ бичиж өгөөд өлсгөлөнгөө үргэлжлүүлсэн.

-Сэтгүүлчид мэдээлэл авах гэхэд дотогш нэвтрүүлэхгүй байна лээ?

-Тийм зүйл байхгүй. Сэтгүүлчээс өөр хүн дотогш нэвтрүүлэхгүй.

-Бүлэг байгуулна гэлээ. Лоби бүлэг гэж ойлгож болох уу?

-УИХ хоёр үндсэн бүлэг үйл ажиллагаа явуулдаг. Нэг нь наймаас дээш суудалтай, сонгуулийн үр дүнд байгуулагдсан албан ёсны бүлгүүд. Бусад бүлгүүд нь лоби бүлэг нэртэйгээр үйл ажиллагаа явуулдаг. Үүнтэй адил УИХ-ын долоон гишүүн бүлэг байгуулсан.

Г.Нацаг