УИХ-ын гишүүн, МАН-ын бүлгийн дарга Д.Тогтохсүрэнгээс цаг үеийн асуудлаар тодрууллаа.

-МАН-ын бүлэг өнөөдөр хуралдах ёстой байсан ч ирц хүрээгүйн улмаас хурал хойшилсон. Ирц ямар шалтгааны улмаас хүрээгүй юм бол?

-Өнөөдрийн бүлгийн хурлаар хэд хэдэн чухал асуудлыг хэлэлцэх ёстой байсан. Засгийн газраас ажиллаж улсын сайн малчин, тэргүүний тариаланчдын шагналыг УИХ-ын гишүүдийг гардуулж өгөөч гэсэн хүсэлт гаргасан. Энэ дагуу 25 гишүүд энэ сарын 26-29-ны хооронд орон нутагт ажиллаж байна. Тиймээс бүлгийн хурлыг хойшлуулсан. Гэхдээ энэ долоо хоногт багтааж хуралдана.

-Маргааш УИХ-ын даргыг чөлөөлөх тогтоолын төслийг хэлэлцэнэ. Тиймээс гишүүд өнөөдөртөө багтаж ирж амжих болов уу?

-УИХ-ын даргыг чөлөөлөхтэй холбоотой асуудлаар УИХ-ын нэр бүхий 39 гишүүний өргөн барьсан. Тогтоолын төслийг маргааш өглөө 09.00 цагаас Төрийн байгуулалтын байнгын хороо, 10.00 цагаас УИХ-ын нэгдсэн чуулганаар хэлэлцэнэ гэж өнгөрсөн долоо хоногт шийдвэрлэсэн. Тэгэхээр маргааш Төрийн байгуулалтын байнгын хороо болон УИХ-ын нэгдсэн чуулган хуралдана. Тиймээс гишүүдийг өнөөдөртөө багтааж нэгдсэн чуулгандаа ир гэсэн чиглэл өгсөн.

-Нэгдсэн хуралдааны үеэр танай намын бүлгийн зүгээс завсарлага авах уу. Хэрвээ ийм нөхцөл байдал үүслээ гэхэд чуулган завсарлаж таарах байх?

-Намын бүлгийн 34 гишүүн буюу олонх нь гарын үсэг зурсан. Тиймээс намын гишүүдийн зүгээс завсарлага авна гэсэн зүйл байхгүй байх. Үүнийг хамт олноороо ярьж шийдэх асуудал. Ганцхан би шийдэхгүй. Ер нь бүлэг завсарлага авна гэдэг бол бүлгийн хамт олны гаргасан шийдвэрийн дагуу авдаг. Түүнээс биш дуртай нэг нь гар өргөөд завсарлага авдаг байж болохгүй.

-Бүлгийн хурлаар дараагийн УИХ-ын даргын асуудал яригдах уу?

-Яригдана. Дараагийн УИХ-ын даргын асуудал өөрийн гэсэн процедуртай. Нэгдүгээрт, улс төрийн албан тушаалтан байх ёстой. Дараагийн УИХ-ын даргын асуудлыг намын Удирдах зөвлөл, намын бүлгийн хурлаар хэлэлцэнэ. Мөн Төрийн байгуулалтын байнгын хорооны хурлаар хэлэлцээд УИХ-ын нэгдсэн чуулганаар хэлэлцэнэ.

-Намын Удирдах зөвлөл хэзээ хуралдах вэ. УИХ-ын даргад хэчнээн хүний нэр яригдаж байгаа вэ?

-Одоогоор хэний ч хүний нэр яригдаагүй байна. Эхлээд УИХ-ын даргыг чөлөөлөх шийдвэр гарсны дараа энэ асуудал яригдана.

-Хэрвээ АН-ын бүлэг завсарлага авбал УИХ-ын даргыг чөлөөлөх асуудал хойшлох юм байна гэж ойлгож болох уу?

-Энэ бол тэр бүлгийн л асуудал.

-Бүлэг дотроос УИХ-ын дарга болох магадлалтай хэн бол?

-УИХ-ын нэр хүнд тааруу байна гээд хэвлэл мэдээллийн хэрэгслээр гарсан байна. Тэгэхээр УИХ-ын нэр хүндийг сайжруулж, гишүүдийн сахилга хариуцлагыг өндөржүүлж, УИХ-ын 2016 оны сонгуулийн мөрийн хөтөлбөрт амласан амлалтыг биелүүлэх хүн гарах байх. Ийм хүн манай нам дотор олон бий.

Р.Хишигжаргал