УИХ-ын өнөөдрийн ээлжит бус чуулганаар УИХ-ын дарга М.Энхболдыг үүрэгт ажлаас нь чөлөөлөх санал, УИХ-ын тогтоолын төслийг хэлэлцэж байна. Чуулганы нэгдсэн хуралдаанд нийт 65 гишүүн ирсэн бөгөөд энэ талаар Ё.Баатарбилэг гишүүн “Харагдаж үзэгдээгүй олон гишүүн ирсэн байна. Тууштай байна гэж найдаж байна” гэсэн юм. 
Үүнээс гадна гишүүд хэлэлцэж буй асуудалтай холбогдуулж асуулт асууж үг хэлэв. Тухайлбал, О.Баасанхүү гишүүн “Огцруулах гээд байгаа хүмүүс хуулийн байгууллага надад ямар нэгэн эрүүгийн хэрэг заавал олж ир, шалгаж эрүүгийн хэрэгт холбогдох захиалга өгсөн гэж ярьсан. Хэн яг өөрийг чинь эрүүгийн гэмт хэрэгт гүтгэх гээд байна. М.Энхболд дарга өгсөн үү. Энэ маш ноцтой хэрэг. Мөн УИХ-ын дарга М.Энхболдоос асуумаар байна. Тавантолгой, Оюутолгой, Эрдэнэтийн 49 хувийн асуудалд таныг холбоотой гэх юм. Таныг үүний ард байдаг гээд танай намынхан хэлээд байх юм. Та яаж нөлөөлж МАНАН мафийн толгойлогч болтлоо дэвшсэн юм бэ. 2016 онд МАХН-аас 60 тэрбумын хэрэг үнэн. Ерөнхийлөгчийн сонгуульд нэр дэвшүүлж болохгүй гээд байхад болно гэсээр байгаад нэр дэвшүүлсэн. Дэмжсэн хүмүүсээс 40 гишүүн нь таныг заавал унагаа гэх юм. Ямар учиртай юм бэ. Үнэхээр огцрох үндэслэл байгаа бол та яагаад огцрохгүй байгаа юм бэ” гэв. 
Т.Аюурсайхан “Дан ганц УИХ-ын даргыг чөлөөлөх асуудал яригдаагүй. Сүүлийн 10 гаруй жил бүрэлдэн тогтсон тогтолцоог нураахад чиглэгдсэн зүйл. Энэ бол Эрдэнэт, Тавантолгой, Оюутолгойг хувьдаа авах орд газруудыг эзэмшихийн төлөө том системийг бий болгосон байна. Системийг нураахын төлөө би зориглож явж байна. 
Хуулийн байгууллагууд ямар ч хамаагүй асуудал ол гэсэн даалгавар өгсөн байна. Газар олгосон байх ёстой адилхан газрын наймаачин болго. Үүнийг ол, үүнээс хойшоо бүх юмыг нь олж мэд гэсэн үүрэг өгсөн байна. Миний гэрт төхөөрөмж суурилуулсан асуудал ч байгаа. Гэхдээ үүнийг реформ хийхгүйгээр, зорьсон зорилтоо биелүүлэхгүйгээр шийдэж чадахгүй. Яагаад гэдгийг нь та мэдэж байгаа. Энэ асуудлыг шийдсэний дараа комисс байгуулах болно. Зөвхөн байнгын хорооны хүмүүс биш Аюулгүй байдлын байнгын хорооны хурал жижигдэн гэж бодож байна. УИХ-ын дараагийн даргын захирамжаар комисс ажлуулна гэж бодож байгаа. Хүсвэл та бүхэн орж болно. Би хуулийн байгууллагын хууль бус улс төрийн зорилготой ажиллагааг ил болгоно. Бүгд тогтоолтой гарч байгаа зарим тогтоолгүй. Маш олон нотлох баримтыг хуулийн байгууллагын гар, хөл нь жалганд очиж саяхан шатаасан үүнийг ил болгоно. Энд та хамтарч ажиллаарай” гэв. 

О.Баасанхүү гишүүн “маш ноцтой мэдэгдэл хийж байна. Тийм учраас л таниас асуугаад байгаа юм. Тусгай төхөөрөмж тавьсан, машин машинаар баримтыг шатаасан, эрүүгийн хэрэгт холбогдуулах гээд байгаа гэж байна. Хэн юм бэ. Надад хэн гэдгийг нь л хэлчих” гэхэд УИХ-ын гишүүн Т.Аюурсайхан “Энэ асуудлыг бид УИХ-аас байгуулах тусгай комиссын үр дүнд ил болгоно, энд би итгэлтэй байгаа. Ер нь нэлээн зориг зүрх гаргаж явж байгаа. Өнөөдрийн хувьд хэн гэдгийг нь хэлэх арай болоогүй. Бүх юм ээлж дараатай” гэв. УИХ-ын чуулган үргэлжилж байна.

Р.Хишигжаргал