Монголын морин спорт уяачдын холбооны VII их хурал энэ сарын 24-ний өдөр зохион байгуулсан билээ. Уг хуралдаанаар Үндэсний морин уралдаанд оролцох морьдыг сэрвээний өндрөөр хэмжиж, уралдаанд оролцуулах болсон шийдвэрийг гаргасан. Тэгвэл уг шийдвэр болон үндэсний морин уралдаанд “эрлийз” адууг оролцуулдаг асуудлыг эсэргүүцсэн уяачдын төлөөлөл мэдээлэл хийлээ.

Уяач Е.Үнэнпүрэв “Монголын морин спорт уяачдын холбооноос 21 аймаг, 330 сумын уяачдаас авсан санал асуулгаар 82.6 хувь нь монгол адуугаараа уралдах саналыг дэмжсэн. Гэвч эрлийз адуу уралдуулах асуудал жил бүр гарч, маргааныг дагуулах болсоор удлаа. Төр засгийн зүгээс ямар нэгэн зохицуулалт байхгүй, анхаарлаа хандуулдаггүй тул ийм асуудал байнга гарч байна. Холбооны зүгээс уяачдынхаа эрх ашгийг хамгаалж, хангаж ажилладаг байх ёстой байх атал эсрэг үйл ажиллагаа явуулж байна” гэлээ

Тэгвэл Хэнтий аймгийн уяачдын төлөөлөл Н.Санжаадорж “Бид нэн түрүүнд үндэсний морин уралдааныг спорт юм уу, эсвэл Монголын өв соёл юм уу гэдгийг ойлгож, тодорхойлох хэрэгтэй байна. Миний хувьд үндэсний морин уралдаан нь Монголын үнэт өв соёл гэж хэлнэ.

Гэвч ихэнх хүмүүс үүнийг өв соёл бус зөвхөн уралдаан маягаар харж, ойлгодог. Монголын үндэсний өв соёлын хувьд морин уралдааны цаад ач холбогдол нь монгол ахуй, монгол адуугаа дагасан ёс заншил багтаж явдаг. Монгол хүний хүмүүжил, төлөвшил, ур ухаан шингэсэн өв соёл юм.

Мөн үндэсний морин уралдаан гэдэг нь монгол адуу, монгол уяач, монгол хүүхэд унадаг том ёс заншил. Гэвч сүүлийн үед монгол адуугаа уралдахгүй болсноор энэхүү ёс заншил алдагдаж байна. Хэрэв үндэсний морин уралдааныг үндэсний хэмжээний өв соёл гэж ойлгож байгаа бол энэ асуудал Монголын төрийн бодлогын хэмжээнд очиж, зохицуулагдах шаардлагатай байна” гэлээ.

Сүхбаатар аймгийн уяачдын төлөөлөл С.Амартайван “Холбооны их хурлаар морьдыг сэрвээний өндрөөр шалгаруулж, уралдуулах шийдвэр гаргасантай санал нийлэхгүй. Учир нь өндөртөө хүрсэн бүх адуу уралдах боломжтой болж байна гэсэн үг. Мөн монгол морьдыг энэ өндөрт хүргэхийн тулд адууг эрлийзжүүлэх асуудал гарч эхэлнэ. Түүнчлэн эрлийзжүүлсэн морьдоос өмнө нь гарч байгаагүй өвчин хөдөө орон нутагт гарч байна. Ингэснээр монгол адууны жинхэнэ угсаа, залгамж устах аюулд хүрлээ” гэв.