Улс төрийн хөл хөдөлгөөн намжсан энэ үед Хөгжлийн банканд холбогдох хэрэг дахин сөхөгдөж, олны анхаарлыг татаад байна.

Тодруулбал, улсад 1.3 их наяд төгрөгийн алдагдал учруулсан уг хэрэгт нэр бүхий гишүүд, сайдууд холбогдож, хэрэг шүүхэд шилжсэн боловч өнөөг хүртэл шийгдээгүй юм. Тэгвэл Хөгжлийн банкыг шалгах ажлын хэсэг 2015 оны есдүгээр сард байгуулагдаж, ажлын хэсгийн ахлагчаар Хууль зүй, дотоод хэргийн дэд сайд асан Б.Энхбаяр томилогдож байв. Шалгалтаар 1.3 их наяд төгрөгийн санхүүгийн зөрчил илэрсэн тухайг 2016 оны арванхоёрдугаар сарын 14-нд болсон УИХ-ын Хууль зүй, Эдийн засгийн байнгын хорооны хамтарсан хуралдаанаар танилцуулсан байдаг.

Тус банк нь УИХ-ын тогтоолын дагуу үйл ажиллагаагаа явуулах үүрэгтэйгээр 2011 онд УИХ-аас чиглэл өгсөн тогтоол гаргасан ч үүнээс хойш УИХ төдийгүй Засгийн газрын хяналтаас гарсан юм. Дүгнэлтэд “Хууль дүрэм мөрдөөгүй, хуулиас гадуур эрх олгосон. Хөгжлийн банкнаас санхүүжүүлэх ёсгүй төсөл хөтөлбөрийг санхүүжүүлсэнтэй холбоотой хяналтын удирдлага алдагдсан” гэж ажлын хэсэг дүгнэсэн байдаг. Үүний улмаас Хөгжлийн банк нь валютын ханшийн зөрүүнээс 155.3 тэрбум төгрөгийн алдагдал хүлээсэн байна. 

Тэгвэл дээрх тайланг байнгын хороонд танилцуулахаас нэг сарын өмнө Хууль зүй, дотоод хэргийн дэд сайд асан Б.Энхбаяр хэвлэлд өгсөн ярилцлагадаа “200 хуудас бүхий ажлын хэсгийн дүгнэлт гарсан. Таван жилийн хугацааны ажил шалгасан. 1.3 их наяд буюу тухай өдрийн ханшаар 700-гаад сая ам.доллартай дүйх хэмжээний асуудал бий. Үүнийг жижиг асуудал гэж байгааг ойлгохгүй байна.  Хөгжлийн банкнаас шууд болон арилжааны банкаар дамжуулж нийт 2000 орчим аж ахуйн нэгж зээл авсан. Ажлын хэсэг бол ямар нэгэн улстөржилтөөр хандаагүй гэдгийг хариуцлагатайгаар хэлмээр байна” гэсэн юм. Тэгвэл ЗГХЭГ-ын дарга Л.Оюун-Эрдэнэ өнгөрсөн долоо хоногт Хөгжлийн банкны ТУЗ-ийн удирдлагуудыг дуудаж, зээлийн төлөлт, чанаргүй зээлийн эзлэх хувь зэргийг яаралтай нэгтгэж, танилцуулахыг үүрэг болгосон юм. Түүнчлэн Чингис, Самурай бондуудын эргэн төлөлтөд шалгалт оруулахаар шийдвэрлэж байгааг хэлснээр олны анхаарлаас гарсан хэргүүд дахин сөхөгдөөд байна. Тиймээс Хөгжлийн банкыг шалгах ажлын хэсгийг ахлаж байсан Дэд сайд асан Б.Энхбаяраас уг шалгалттай холбогдуулан тодруулга авахыг хүсэхэд “Нууцын зэрэглэлээс гаргах шаардлагатай.

Би ийм л шаардлага тавьж байгаа. Хэрвээ нууцаас гаргавал мэдээлэл өгнө. Түүнээс нааш ярих боломжгүй” гэлээ.

Г.Нацаг