Монгол Улсын Ерөнхийлөгч асан Ц.Элбэгдорж өнөөдөр сэтгүүлчидтэй зангиагүй уулзалт хийснээ өөрийн фэйсбүүк хуудсаараа дамжууллаа. Ингээд ярилцлагын эхний хэсгийг хүргэе.

-Хууль зүйн сайд асан Х.Тэмүүжиний санаачилсан хуулийн шинэчлэлийг зогсоож, түүнийг огцруулж, оронд нь Д.Дорлигжавыг томилсон. Та яагаад ингэсэн юм бэ?

-Би саад болсон зүйл байхгүй. Х.Тэмүүжиний шинэчлэл гэж ярьсан зүйлийг Б.Чимэд гуай анхнаас нь хийх гэж үзсэн хүн. Д.Дорлигжав шавь нь шүү дээ. Б.Чимэд гуайтай хамт суугаад Үндэсний аюулгүй байдлын зөвлөлөөр Монголын хууль, шүүхийн байгууллагыг шинэчлэх үзэл баримтлалыг баталсан. Би Ерөнхийлөгч байхдаа 38 хууль санаачилсан. Үүнд дотор хууль, шүүхийн салбарыг шинэчлэх 12 төсөл байсан. Би Х.Тэмүүжиний шинэчлэлийг зогсоогоогүй. Түүний алдаан дээр дөрөөлж, бусад хүмүүс түүнийг унагаасан. Түүнийг унагаасан хүн нь би биш. Би Монголын ирээдүйн төлөө хамтарч ажиллана гэж хэлсэн. Намайг Ерөнхийлөгчөөр сонгогдох үед шүүхэд итгэх ард түмний итгэл 18-64 хувь болж өссөн. Авлигын индексээрээ 120-т жагсч байгаад яаж буурсныг мэднэ биз дээ.

-Х.Тэмүүжинг замаасаа зайлуулсан шалтгаан нь Ерөнхийлөгчийн эрх мэдлийг хасах гэж үзсэн учраас таныг холдуулсан гэх юм?

-Тийм зүйл байхгүй.

-Таныг Улсын Ерөнхий прокурор асан Д.Дорлигжавтай хамтардаг байсан гэх яриа бий. Прокуророос сайд болгосон гэхээр холбоотой юм шиг?

-Надтай хамтарч ажилладаг хүмүүс өөрийнхөө итгэл үнэмшил, сэтгэл зүтгэлээр ажилладаг байсан. Д.Дорлигжавыг харлуулсан үйлдлийн цаана Х.Баттулга байгаа. Т.Ганболдын хөрөнгө дээр Х.Баттулга очиж ийм тоглолт хийж байна. Яг үнэндээ Д.Дорлигжавд бүх хар хэргийг үүрүүлэнгүүтээ бузар булай болгож харуулахыг хичээж байна. Үнэхээр тийм л юм бол УИХ чуулган дээр нээлттэй сонсгол хийх хэрэгтэй. Намайг дууд. Бүгдийг нь дууд. Тавантолгойн төслийг зогсооход амиа хорлосон хүн бий. Тэдний ар гэрийнхнийг бас дууд л даа. Асуудлыг зөвхөн нэг талаас нь харуулж байна.

-Таныг Ерөнхийлөгчөөр сонгогдох үед экс Ерөнхийлөгч Н.Энхбаяр шоронд хоригдсон. Тэр үед Н.Энхбаяр таныг буруутгасан. Гэтэл та одоо Ерөнхийлөгчийн суудлаас буунгуутаа Х.Баттулгыг буруутгаж байна. Эндээс өмнөх үеэ үгүйсгэдэг, буруутгадаг тогтолцоо бий болчих вуу гэж харагдаж байна?

-Би өөртөө итгэлтэй байна. Намайг шалга. Гэхдээ юу ч олж чадахгүй шүү. Би найман хүүхэдтэй малчин айлын хүүхэд. Миний зорилго өөр. Би албан тушаалд ороод өөрчлөгдөөгүй. Намайг ийм муухай юм хийсэн гэж ярьдаг л юм.

-ТЕГ-ын дарга асан Б.Хурц таны талын гэдэг хүн. Та түүнд генерал цол олгож байсан юм билээ?

-Үндсэн хуульд өг гээд заасан эрх шүү дээ. Засгийн газраар оруулдаг журамтай. Зэрэглэл тогтоосон Ерөнхийлөгчийн зарлигтай. Үүний дагуу генерал цол олгодог юм.

-Таныг олон хүнд одон медаль олгосон гэх юм билээ?

-Бүхэл бүтэн найман жилийн хугацаанд шүү дээ.

-Таныг Б.Хурцыг шоронгоос гаргаж албан тушаал өгсөн гэдэг. Та үнэхээр тэгсэн юм уу?

-Би шоронгоос хүн гаргадаг хүн биш. Германд ямар ажлаар явж байсныг бүгд мэднэ. Би тайлбар хийх шаардлагагүй. Миний зарчим бол хийж байгаа ажилдаа эзэн болдог хүнийг зохих байрт тавихыг хичээдэг. Хууль бус үйлдэл хийсэн хүний үйлдлийг Б.Хурц мэддэг. Би үүнийг л мэднэ.

-Та М.Энхболдтой ямар харилцаатай юм бэ?

-Тэд л ингэж харуулж байгаа шүү дээ. Надад М.Энхболдтой холбогдох зүйл байхгүй. Хамгийн бага харилцаатай хүн нь би. Ц.Элбэгдорж ингэж, тэгж ажилладаг байсан гэж харлуулахыг хичээсэн. Би өөрийнхөө мэдлэг, туршлагын хүрээнд ажилладаг. Тэдний ажилладаг зарчим өөр.

-Х.Баттулга та хоёрыг сайн харилцаатай байсан гэсэн. Гэтэл та өнөөдөр албан ёсны хулгайч гэж байна. Хэзээнээс үүнийг мэдэв. Та төөрөлдсөн байсан юм уу?

-Хувь хүний хувьд найз. Энэ бол өөр асуудал. Өмнө нь амин найз минь байлаа. Хэрвээ өнөөдөр муу зүйл хийвэл Монголын аминд хүрэх аюултай ийм суудал дээр сууж байна Тиймээс Монгол чухал уу, Х.Баттулга чухал уу. Миний сонголт Монгол байх болно. Би Х.Баттулгад таван жилийн өмнө дуудаад “Чи улстөрөөс гар. Чамд зохихгүй юм байна. Хөшөөгөө барь, үйлдвэрээ байгуул, хотоо барь, бизнесээ хий. Чиний улс төр төрийг ойлгож байгаа ойлголт өөр. Чи бол хаана мөнгө байна, хаана эрх ашиг байна гэж гараа халаасандаа хийгээд харж байна. Төрийн ажлыг хялбар харж байна. Битгий ингэ. Улс төрөөс гар гэж хэлсэн. Найзын зөвлөгөө та нарт харагдахаас өөр. Тэгэхээр сүүлд нэг дүгнэлт хийсэн юм. Х.Баттулга намайг өөрт нь саад болж байна гэж бодсон байх. Тиймдээ ч надаас холдсон. Харин ч үүнээс хойш маш их алдаж эхэлсэн. Хэрвээ Х.Баттулга улс эх орондоо сайн зүйл хийвэл би Ерөнхийлөгч гэдэг утгаар нь хүндэлж харьцана. Харин эсрэгээрээ бол Х.Баттулга гэж харьцах болно.

Г.Нацаг