Өвөрхангай аймгийн аравдугаар тойрогт МАН-аас нэр дэвшигч Н.Төмөрхүү, С.Чинзориг нарын гомдлыг өнгөрсөн даваа гаригт Нийслэлийн шүүхэд хэлэлцэж,  анхан шатны шүүхийн шийдвэрийг хүчингүй болгосон.
    Өвөрхангай аймгийн аравдугаар тойрогт МАН-аас нэр дэвшигч Н.Төмөрхүү, С.Чинзориг нарын гомдлыг өнгөрсөн даваа гаригт Нийслэлийн шүүхэд хэлэлцэж,  анхан шатны шүүхийн шийдвэрийг хүчингүй болгосон. Ингэснээр тэдний түр түдгэлзээд байсан УИХ-ын гишүүний бүрэн эрх баталгаажих бүрэн боломжтой болсон юм. Гэвч нэхэмжлэгч тал цагдаагийн байгууллагад хандаж, хэргийг дахин Өвөрхангай аймгийн шүүхээр хэлэлцүүлэхээ мэдэгдээд буй. Энэ талаар Н.Төмөрхүү, С.Чинзориг нарын өмгөөлөгч Б.Цэнддоржтой ярилцлаа.

-Нийслэлийн шүүхээс гаргасан шийдвэрийг төдийлөн ойлгохгүй байна. Нэг бол хэрэгсэхгүй болгож, Н.Төмөрхүү нарыг тангараг өргөнө. Нөгөө талаасаа дахин цагдаагийн байгууллагаар шийдэгдэнэ гэх?

-Нийслэлийн шүүхээс хоёр асуудлыг шийдвэрлэж, шийд гаргасан. Нэгдүгээрт, ХУД-ийн анхан шатны шүүхээс гаргасан шийдвэрийг хүчингүй болгосон. Учир нь сонгуулийн маргааныг иргэний хэрэг шүүхээр хянан шийдвэрлэх үндэслэл байхгүй. Тэгэхээр анхнаасаа хэргийг ХУД-ийн шүүх хүлээн авч шийдвэрлэх боломжгүй. Хоёрдугаарт, Энэ нь иргэний хэрэг биш учраас хэрэгсэхгүй болгосон. Нэхэмжлэгч тал гомдлоо журмын дагуу гаргаагүй гэж дүгнэсэн. Тиймээс уг асуудлуудыг үндэслэн хэргийг бүхэлд нь  хэрэгсэхгүй болгосон юм. Үүнээс нэхэмжлэгч талын гомдол гаргахаас эхлээд шүүхийн шийдвэр гарах хүртэлх бүх процесс бүгд хууль бусаар явагдсан гэж ойлгож болно.

-Гэвч нэхэмжлэгч тал цагдаад хандана гээд байгаа?

-Цагдаагийн байгууллагаар шийдэх тухай ярьсан байна лээ. Гэхдээ өмнө нь энэ маргааныг аймгийн цагдаагийн байгууллага шалгаад, прокурор давхар хянаад эрүүгийн хэрэг үүсгэх үндэслэлгүй гээд эрүү үүсгэхээс татгалзсан байдаг. Энэ албан ёсны шийдвэрүүд нь ч хүчин төгөлдөр байгаа. Ийм байхад дахин цагдаад хандах нь эрхзүйн хувьд боломжгүй. Цагдаагийн байгууллага нэгэнт хянаад шийдчихсэн. Тэгэхээр дахин хянаж шалгахгүй.

-Тэгэхээр уг асуудал ингээд дуусна гэж ойлгож болох уу?

-Нэхэмжлэгч талд давж заалдах эрх байгаа. Нийслэлийн шүүхийн шийдвэрийг эсэргүүцэж байгаа бол хяналтын шатны журмаар Дээд шүүхэд гомдол гаргаж болно.

-Хэрвээ хяналтын шатны шүүх Нийслэлийн шүүхийн шийдвэрийг хэвээр баталвал?

-Тэгвэл тэдэнд өөр ямар ч боломж байхгүй. Ер нь энэ гомдлыг хэлэлцэх ажиллагааг үндсэндээ Нийслэлийн шүүхээс нэг бүрчлэн заагаад өгчихсөн гэж ойлгож болно. Хуулийн тодорхой үндэслэлүүд хангалттай байгаа учраас энэ нь иргэний журмаар шийдэх хэрэг биш байна гээд тайлбар хийчихсэн. Өөрөөр хэлбэл, ХУД-ийн шүүх харьяаллын бус хэргийг шийдсэн гээд тодорхой заачихсан учраас Дээд шүүх яг л энэ зарчмыг баримталж, шударгаар шийднэ гэдэгт итгэлтэй байна. Хуулийн талаасаа ч тэр давж заалдах шатны шүүхээс өөр шийдвэр гаргах үндэслэл үлдээгүй.

-Нийслэлийн шүүхийн шийдвэр гарснаар Н.Төмөрхүү, С.Чинзориг нарын УИХ-ын бүрэн эрх баталгаажих боломжтой юу?

-Хуулийнхаа дагуу бид долоо хоногийн дотор шүүхийн шийдвэрийг хүлээж аваад, СЕХ-нд хүргүүлнэ. СЕХ шүүхийн шийдвэрийг хянаж үзээд нэр дэвшигчдийн бүрэн эрхийг хэрэгжүүлэх алхмаа хийх ёстой. Ер нь Н.Төмөрхүү, С.Чинзориг нар тангаргаа өргөх эрх нь 100 хувь нээгдсэн гэж ойлгож болно.

-СЕХ шүүхийн шийдвэрийг авч хэлэлцэхгүй тохиолдолд яах вэ?

-СЕХ ийм шийдвэр гаргах ямар ч хууль эрхзүйн зохицуулалт байхгүй. Учир нь  СЕХ энэ гомдлыг шийдвэрлэхдээ гурван шатны шүүхийн шийдвэр эцэслэн гараагүй байхад буюу анхан шатны шүүхийн шийдвэрийг үндэслээд нэр дэвшигчдийн тангараг өргүүлэхээс түр татгалзсан. Үүнээс өөрөөр тангараг өргүүлэхгүй байх үндэслэл дурдаагүй. Харин одоо энэ шийдвэр хүчингүй болж байна гэдэг нь СЕХ нэр дэвшигчдийг бүртгэхгүй байх шалтгаан үлдсэнгүй гэсэн үг.