Боловсрол, соёл, шинжлэх ухаан, спортын сайд Ё.Баатарбилэг “Боловсролын салбар ийм л дампуу салбар болсон байна” гэж өчигдөр цохон тэмдэглэсэн нь өмнөх сайд Ц.Цогзолмаагийн ажлыг хатуухан дүгнэчих шиг болов. Учир юу гэвэл, өчигдөр зохиогдсон нийслэлийн боловсрол, соёл, спортын салбарын хөрөнгө оруулалтын төсөл, арга хэмжээний танилцуулгын үеэр сайд Ё.Баатарбилэг ийн цохон тэмдэглэсэн бөгөөд дампуу байдлыг засна гэдгээ амласан юм. Тэрбээр “Сурах бичгийн хомсдолын асуудлыг шийдвэрлэх хэрэгтэй байна. Тиймээс сурах бичгийн агуулга, чанарыг сайжруулах, тоог хэрхэн нэмэгдүүлэх боломжтой талаар ажиллаж байна. Өмнөх жилүүдэд ч сурах бичгийн асуудал байсан. Боловсролын салбар ийм дампуу болсон учраас үүнийг засахын төлөө ажиллаж байна. Зарим  нэг хариуцлагагүй нөхдийн үйлдлээс болж маш олон газруудыг хувийн хэвшил, концесс нэрээр авчихсан. Түүнийгээ барихгүй гацаах асуудал олон бий. Ийм асуудалтай эвлэрч болохгүй. Ойрын хугацаанд шаардлагатай, холбогдох шийдвэрүүдийг гаргуулахын төлөө ажиллана” гэв.

Үүнээс үзэхэд шинэхэн сайд Ё.Баатарбилэг өмнөх сайдын хийсэн ажилд хангалтгүй дүн тавьчих шиг боллоо. Учир нь Ц.Цогзолмаа сайдын үед 24 сурах бичиг өндөр төсвөөр шинэчлэгдсэн боловч энэ нь сурагчдад хүртээмжтэй байж чадалгүй явсаар бүтэн жилийн нүүр үзэж буй. Сүүлийн таван жилд гэхэд ерөнхий боловсролын сурах бичиг хоёр удаа шинэчлэгдсэн нь “Сайд солигдохоор сурах бичиг дагаад өөрчлөгддөг” гэх ярианы эх сурвалж болж байв. Энэ ч утгаараа сайд асан Ц.Цогзолмааг сурах бичиг өөрчилж, халаа сэлгээ хийснээс өөр хийсэн гавъяагүй сайд хэмээн салбарынхан нь шүүмжилсан удаатай. “Сайны хажуугаар саар” гэгчээр боловсролын салбарт сайн сайхан зүйл хийсэн л байх. Гэвч салбарынхан болоод иргэд өөрсдийн харснаараа ийм дүн тавьсан болохоор өөр яалтай.

Учир нь Ц.Цогзолмаа сайдаар томилогдсон даруйдаа л салбартаа шинэчлэл хийж, ажилчддаа хална гэж хэлээд салбарынхныхаа дургүйцлийг хүргэсэн удаатай. Тэрбээр хэлсэн өчгөндөө хүрч томоохон халаа сэлгээний аян өрнүүлсэн. Тэр ч бүү хэл, өөртэй нь босож мэндлээгүй гэх шалтгаанаар дөрвөн ажилтанд “банга” хүртээсэн гэдэг мэдээлэл хүртэл гарч байв. Үндсэндээ сайд асаны үед боловсролын салбарт гарсан томоохон өөрчлөлт гэвэл ердөө л энэ болов уу.

Энэ ч утгаараа У.Хүрэлсүхийн Засгийн газраас Боловсрол, Соёл, Шинжлэх ухаан, Спортын яам хамгийн их асуудалтай салбараар тодорч, түүнийг салбарыг утгаар нь “самарсан” эрхэм гэж нэрлэсэн удаатай.

Тэгвэл сайд Ё.Баатарбилэгийн хэлсэнчлэн сургууль, цэцэрлэгийн барилгуудад шинэчлэх хийхээс эхлээд сурах бичиг тойрсон асуудлыг цэгцлэх гээд ажл мундахгүй их бий. Энэ бүхнийг цэгцэлж, гольдролд нь оруулахад буюу түүний хэлснээр боловсролын салбарыг дампуурлаас аварч, ажилдаа хангалттай дүн тавиулах эсэхийг дүгнүүлэхэд жил гаруйн л хугацаа үлдлээ. Энэ хугацаанд амжиж дампуу салбарт амь тариа хийж сэхээх үү, эс бөгөөс дампуурсан дээр нь самрах уу гэдэг нь Ё.Баатарбилэг сайдын мэдлийн асуудал. Хамгийн гол нь “Ноёны алба халаатай” гэдэг шиг таны ажлыг дүгнэх дараагийн сайд халаагаа хүлээгээд суугаа шүү. Тиймээс ажилдаа чин сэтгэлээсээ хандаж, дампуурсан салбарт амь тариа хийж, Монголын ирээдүйг авраач гэж Ё.Баатарбилэг сайдаас аминчлан хүсэе.

Б.Лхам