НИТХ-ын төлөөлөгч Т.Батцогттой ярилцлаа.

-Баянзүрх дүүргийн 10, 19 дүгээр тойрогт дахин сонгууль явуулах шаардлагагүй гэж та үзсэн. Ямар учраас та ийм байр суурьтай байгаа юм бэ?

-Сонгууль зохион байгуулах ажлын хэсэг бүрэлдэхүүн өнөөдөр энэ асуудлыг оруулж ирэхэд сонгуулийн хорооны дарга нь солигдсон байна. Өмнөх сонгуулийн хорооны дарга болон бүрэлдэхүүн нь бүгдээрээ төрийн өндөр албан тушаалд томилогдсон. Гэтэл дараагийн ажлын хэсэг нь иргэдээс олонхийн санал авч сонгогдсон төлөөлөгчийг хасах шийдвэр гаргасан. Энэ асуудлыг хууль, шүүхийн байгууллага хэлэлцсэн. Харамсалтай нь, дахин сонгууль зарласан. Сонгуулийн тухай хуулийн 160.4 дэх заалтыг УИХ-ын хуралдаанаар хассан. Хассан заалтыг үндэслэж хүчээр дахин сонгууль явуулах гэж үзэж байна. Үүнийг бид холбогдох хуулийн байгууллагад мэдэгдсэн. Эцсийн шийдвэр гаргах хуулийн дээд шатны байгууллагын шийдвэр гараагүй маргаантай байхад хүчээр сонгууль явуулах гэж байгааг ойлгохгүй байна. Төрийн албан хаагч намчирхаж, нэг талд үйлчилснийхээ төлөө албан тушаал ахиж, шан харамж авдаг нөхцөл байдал үүссэн байна. Тиймээс энэ байдлаа орхиж, үндсэн ажлаа хийх хэрэгтэй байна. Энэ их зардал мөнгийг дахин гаргах ямар шаардлага байна. 2016 онд олонхын санал авч сонгогдсон төлөөлөгч байхад дахин сонгууль зарлах шаардлагагүй.

-Дээд шүүхээс шийдвэр гарсан гэж ойлгосон?

-Дээд шүүхийн шийдвэр маргаантай байгаа. Дээд шүүх Сонгуулийн тухай хуулийн 160.4 дэх хуулийн заалтыг үндэслэсэн. Гэтэл үүнийг нь УИХ-аас  энэ заалт хүний эрхэд халдсан байна гэж үзээд тус заалтыг хүчингүй болгосон байна лээ.

-Баянзүрх дүүргийн 10, 19 дүгээр тойргоос олонхын санал авсан төлөөлөгч эрхээ хэрэгжүүлж чадаж байна уу?

-Анхдугаар хуралдаанд оролцсон бүх төлөөлөгчид бүрэн эрх нь хэрэгжээд явж байна. 2016 оны арваннэгдүгээр сард Баянзүрх дүүргийн 10, 19 дүгээр тойргоос сонгогдсон н.Өлзийболд, н.Эрдэнэсайхан төлөөлөч нар өөрсдийн сонгогдсон тойрог, иргэдтэйгээ өнөөдрийг хүртэл төлөөллийн зарчмаа хэрэгжүүлж ажиллаж байгаа.

-НИТХ-ын өнөөдрийн хурлаар энэ асуудал дээр ямар шийдвэр гарсан юм бэ?

-НИТХ-ын тэргүүлэгчид сонгуультай холбоотой ямар нэгэн шийдвэр гаргах эрхгүй. Гэтэл энэ сонгуулийн хороо буюу ажлын хэсэг нь өөрийн эрх мэдэл, танил тал, намын байдлаа ашиглаж эрх бүхий дээд байгууллагадаа ингэж хандаж, асуудлыг хүчээр шийдүүлэх гэж оруулж ирлээ. Харамсалтай нь, хэвлэл мэдээллийнхэн байсан учраас энд ямар нэгэн шийдвэр гарсангүй. Зөвхөн хэлэлцэгдэж, танилцуулагдсан болоод өнгөрлөө.

-Гэхдээ сая С.Амарсайхан дарга хуулийн дагуу байр саваа гаргаж, шаардлагатай бол Засаг даргын хөрөнгөнөөс гаргаж сонгуулийг явуулна гэсэн утгатай зүйл ярьсан?

-Хүмүүс Баянзүрх дүүргийн Засаг дарга яагаад хөрөнгө мөнгийг нь шийдэхгүй байгаа юм бэ. Яагаад байр, ажиллах нөхцөлийг нь хангахгүй байна гээд байна. Энэ асуудал нь хууль зөрчсөн тогтоол гаргасан учраас тэр. Хэрвээ хууль хууль ёсны байвал үүнийг заавал шийдүүлэх ёстой. Гэтэл хууль бус, маргаантай байхад хүчээр сонгууль явуулах гээд байгаад гайхаж байна.

Р.Хишигжаргал