НИТХ-ын дарга С.Амарсайханаас цаг үеийн асуудлаар тодрууллаа.

-Энэ сарын 26-нд Нийслэлийн Засаг даргыг сонгох хурал болно. Та нэр дэвших үү?

-НИТХ-ын өнөөдрийн хурлаар 26-ны өдрийн 11.00 цагаас ээлжит бус хурлаар Нийслэлийн Засаг дарга бөгөөд Улаанбаатар хотын захирагчийг асуудлыг хэлэлцэхээр тогтоолоо баталж хурлын товыг зарласан. Энэ хүрээнд НИТХ-аар асуудлуудаа хэлэлцэж шийдвэрүүдээ гаргана.

-Та өрсөлдөх үү?

-Би намын бодлого, шийдвэрийг дагана.

-Хэрвээ Удирдах зөвлөлөөс санал ирвэл та өрсөлдөнө гэсэн үг үү?

-Удирдах зөвлөлийн, намын бодлого, шийдвэрийг л дагана.

-Удирдах зөвлөл таны нэрийг дэвшүүлэх боломжтой юу?

-Тэр бол намын асуудал.

-Удирдах зөвлөл хэзээ хуралдах вэ?

-Удирдах зөвлөл хуралдаад шийдвэрээ гаргасан шүү дээ.

-НИТХ дахь Нийслэлийн МАН тарсан гэсэн мэдээлэл байна. Энэ үнэн үү?

-Тийм зүйл байхгүй. НИТХ-д МАН-ын бүлэг 34 төлөөлөгчтэй байсан. Түүнээс хоёр төлөөлөгч нь намаас гарсанд тооцсон учраас 32 төлөөлөгчтэй намын бүлэг үргэлжлүүлэн цааш явна.

-Өчигдрөөс эхлээд тантай холбоотой зураг сошиалиар яваад эхэллээ. Та алтан эдлэл бэлгэнд авсан юм уу?

-Би твиттерээр тайлбар хийсэн. 2016 оны есдүгээр сард нийслэлийн дэд бүтэц, гэр хороололын дахин төлөвлөлттэй холбоотой гадаадын хөрөнгө оруулагчид, төсөл хэрэгжүүлэгчид ирж санал солилцсон. Тухайн үед Монгол Улсын Ерөнхий сайд байсан Ж.Эрдэнэбаттай албан уулзалт хийсэн. Мөн МАН-ын Ерөнхий нарийн бичгийн дарга Б.Амарбаясгалан, тухайн үеийн хотын даргатай уулзуулсан. Тэр үеэр бэлэг дурсгалын жижиг шаазан эдлэл өгсөн юм байна лээ тэрийг тавьсан байна лээ. Ойлгомжтой асуудал дээр тийм гүтгэлэг явуулах хэрэггүй гэж бодож байна.

Р.Хишигжаргал